Governu presiza kria asesibilidade ba EhD iha eleisaun parlamentár
DILI, 02 fevereiru 2023 (TATOLI)—Asesór Prinsipál Asuntu Sosiál hosi Prezidénsia Repúblika, Gaspar Afonso, husu Governu presiza kria asesibilidade ba Ema ho Defisíensia (EhD) iha eleisaun parlamentár 2023 ne’e.
Notísia Relevante: Eleisaun parlamentár: STAE-Governu sei kria kondisaun EhD vota mesak
“Asesibilidade ba tipu defisiénsia hotu-hotu, ezemplu brigadista sira tenke hatene netik lian jestuál bainhira ema ho defisiénsia labele rona no labele ko’alia ba vota karik, sira bele komunika. Ba maluk sira-ne’ebé uza kadeira roda bele sa’e mesak ba tama sentru votasaun no ami ho defisiénsia matan ba vota karik templeit braille ne’e tenke iha kada sentru votasaun bele fasilita ona ami ba vota mesak,” Asesór Prinsipál Asuntu Sosiál hosi Prezidénsia Repúblika ne;e hateten ba jornalista sira iha Palásiu Prezidensiál, Nicolau Lobato, Bairru Pite, kinta ne’e,
Tanba ne’e, nia husu atu iha alterasaun lei eleitorál ba Parlamentu Nasionál ne’e Deputadu sira presiza fó atensaun kria artigu espesífiku ko’alia ba direitu Ema ho Defisiénsia sira, tanba bainhira kondisaun sira-ne’e mak laiha entaun EhD sira labele ezerse sira-nia direitu votu.
“Sei iha alterasaun bele ko’alia mós asuntu ne’e ho lei bele fó dalan atu nune’e tékniku sira bele implementa,” nia dehan.
Tanba, tuir nia, kada tinan lima EhD hala’o advokásia ba órgaun eleitorál Komisaun Nasionál Eleisaun (CNE, siglá portugés) ho Sekretáriadu Tékniku Administrasaun Eleitorál (STAE), hato’o katak sira-nia parte labele hala’o buat ida tanba lei la fó dalan.
Ema ho defisiénsia hanesan mós ema timoroan sira seluk, konstituisaun garante katak iha tratamentu labele haree kór, rasa, etníku, fíziku no mentál ne’ebé ema hotu hanesan laiha diskriminasaun ba malu, aliened PN mós opta ona rezolsaun fraternidade umana.
Iha parte seluk, nia hateten organizasaun EhD sira mós hala’o kooperasaun ho Governu no parseiru sira hala’o edukasaun sívika ba maluk defisiénsia sira hodi partisipa iha eleisaun mai.
Tuir dadus demográfia sensus 2016 rejista ema ho defisiénsia iha Timor-Leste hamutuk 56, 356.
Notísia Relevante: STAE sei rekruta brigada 20.575 ba eleisaun lejislataivu iha semana ne’e
Jornalista : Nelson de Sousa
Editór : Cancio Ximenes
