DILI, 07 fevereiru 2023 (TATOLI)—Parlamentu Nasionál (PN) bolu urjente Ministru Edukasaun Juventude no Desportu (MEJD) mai iha PN, atu bele esplika kona-ba implementasaun programa bolsa méritu ne’ebé deskonfia mosu manipulasaun.
Notísia Relevante: Komisaun G simu lamentasaun kona-ba bolsa méritu hosi diretór edukasaun
“Ami hato’o tiha ona karta ba meza Prezidente Parlamentu Nasionál iha semana kotuk, atu bele bolu urjente Ministru Edukasaun mai plenária Parlamentu hodi bele esplika implementasaun bolsa méritu ne’ebé hanesan Deputadu sira seluk hato’o tiha ona, espera Prezidente bele enkamiña ona,” Prezidente Komisaun G trata asuntu Edukasaun, Juventude, Kultura no Sidadania, António Verdiál de Sousa, hato’o liuhosi reuniaun plenária PN, tersa ne’e.
Iha reuniaun plenária ne’e, Deputadu CNRT Gabriel da Silva, Lúcia Taeki, Deputadu FRETILIN Josefa Perreira, Gabriela Alves mós kontinua levanta bolsu méritu ne’ebé simu lamentasaun barak hosi komunidade iha territóriu kona-ba estudante sira-ne’ebé antes ne’e ho valór aas iha ezame fó sai tiha, ikus mai naran la sai fali no sira-ne’ebé valór ki’ik mak naran sai fali.
Nune’e, reprezentante povu sira-ne’e deskonfia katak mosu manipulasaun ba programa bolsa m’eritu, nune’e presiza bolu urjente Ministru MEJD mai iha PN hodi hala’o esplikasaun kle’an liután.
Prezidente Parlamentu Nasionál, Aniceto Longuinhos Guterres Lopes, hateten rejimentu fó dalan bele komunika membru Governu relevante atu mai ko’alia ka audiénsia tanba asuntu ruma karik presiza klarifikasaun ruma hosi Governu.
“Nune’e meza rejista, haree tempu apropriadu debate parese rekerimentu iha tempu badak,” nia dehan.
Ministru Asuntu Parlamentár no Komunikasaun Sosiál (MAPKOMS), Francisco Jerónimo, hateten presiza duni esplikasaun hosi ministru tutela hodi hala’o klaru liu.
“Kona-ba bolsu méritu, ha’u hanoin saida mak ohin ko’alia loos, tanba dalaruma iha komunikasaun profesór ho diretór sira konplika uitoan kona-ba valór reál no valór PK. Valór PK ne’ebé tuir profesór sira hatene ida-ne’e valór ikus liuhosi ninia rezultadu koma, ne’ebé presiza esplikasaun di’akliu ministru mai esplika hodi na’in hira bele hetan esklaresidu, liu-liu bolsu méritu ba duni ema-ne’ebé iha méritu,” nia hateten.
Notísia Relevante: Membru PN preokupa kazu Padre Abito nia mate
Jornalista : Nelson de Sousa
Editór : Cancio Ximenes
