MOP sei halo manutensaun estrada Batugade-Balibo to’o Maliana
BOBONARO, 08 fevereiru 2023 (TATOLI)-Ministru Obra Públika (MOP) Abél Pires, tersa ne’e ho tékniku sira identifika no halo levantamentu dadus hodi halo manutensaun ba kondisaun estrada hosi suku Batugade, ligasaun hosi postu administrativu Balibo to’o suku Holsa, postu administrativu Maliana, munisípiu Bobonaro.
Hafoin halo observasaun, Ministru Abel Pires, orienta kedas Diretór Jerál Estrada no Ponte Prevensaun Kontrolu Cheias (DJEPPKS), Rui Hernâni no Diretora Nasionál Manutensaun no Konservasaun Rodoviaria (DNMKR), Isabel Maria Lay Guterres, atu halo reablitasaun ba estrada refere.
Notísia relevante: MOP submete pedidu asesu fundu impréstimu reabilita estrada Batugade-Balibo
“Ita tenke halo manutesaun ba estrada sira-ne’e, antes ita halo konstrusaun permanente, hodi fasilita movimentasaun komunidade nian, hosi Batugade to’o Balibó,” Ministru Abel hateten liuhosi nota imprensa, ne’ebé Agência Tatoli, asesu kuarta ne’e.
Governante ne’e hateten, halo uluk manutesaun ba kondisaun estrada refere hodi hein konstrusaun permanente hodi fasilita movimentasaun públiku.
Nune’e Diretór DJEPPKS, Rui Hernâni, sei orienta fali tékniku sira halo levantamentu ba kondisaun estragu hafoin halo manutensaun.
Ministru Obra Públika mós halo observasaun ba ponte Nunura ne’ebé hetan estragu hosi korrente bee-mota iha fronteira entre Timor-Leste ho Indonézia.
Hafoin haree kondisaun atuál iha ponte ne’e, Eis Prezidente Komisaun E (Infraestrutura) ne’e mós orienta kedas tékniku sira halo levantamentu dadus ba mota refere hodi halo normalizasaun, liuliu konstrui moru protesaun inklui halo mós protesaun ba estrutura ponte Nunura.
Notísia relevante: Korrente bee-mota iha fronteira TL-Indonezia sobu barrajen ponte Nunura
Jornalista: Sérgio da Cruz
Editór: Evaristo Soares Martins
