DILI, 08 fevereiru 2023 (TATOLI)–Sekretáriu Estadu Arte no Kultura (SEAK), Teofilho Caldas, hateten nia parte hatene xineza balun ne’ebé hala’o atividade negósiu iha Timor-Leste ne’e imita dezeñu tais Timor no faan maibé SEAK seidauk bele foti medida tanba sei hein hela lei direitu autór ne’ebé iha hela prosesu diseminasaun.
Notísia Relevante: SEAK sei monitoriza xineza imita dezeñu tais faan iha loja
Sekretáriu Estadu Arte no Kultura hatutan, SEAK haruka ona ekipa ida ba monitoriza atividade ne’ebé xineza sira halo ne’e no konsege identifika duni iha grupu komunidade Xineza balun mak konsege prodús no faan ona tais iha Timor-Leste.
“Ita halo de’it monitorizasaun maibé ita seidauk bele foti medida ruma tanba ita laiha baze fundamentál ida. Ita lakohi kriminaliza uluk atividade ne’ebé ita-nia maluk xineza sira halo. Ita la konsege rekolla evidénsia sira-ne’e tanba ita-nia lei diretu ba autór ne’e sei iha hela prosesu diseminasaun nia laran,” Governante ne’e hateten ba jornalista sira hafoin ramata reuniaun Konsellu Ministru iha Palásiu Governu, kuarta ne’e.
Nia esplika, SEAK hamutuk ho Ministériu Ensinu Superiór Siénsia no Kultura (MESSK) no Ministériu Turizmu tau ona iha planu atu halo abertura lei direitu ba autór ne’e iha Maliana hahú fevereiru ne’e.
Hafoin diseminasaun ne’e konklui mak sei ko’alia kona-ba falsifikasaun no kondenasaun ba ema ne’ebé mak falsifika ka halo duplikasaun ba patrimóniu kulturál nasaun Timor nian.
“Lei ne’e sei proteje direitu autór sira-nian no sé mak viola lei ne’e hodi falsifika patrimóniu kulturál nasaun Timor nian, tantu ema Timor ka ema estranjeiru, sei hetan sansaun,” nia dehan.
Entretantu, daudaun ne’e ekipa SEAK inklui asesór sira hamutuk informa ona ba komunidade Xineza sira atu labele halo tan duplikasaun ka imita dezeñu tais Timor, maibé se ida-ne’e mak sira kontinua halo nafatin, entaun lei mak sei kondena sira-nia atividade ne’e.
Entretantu lei direitu ba autór ne’ebé Prezidente Repúblika promulga ona ne’e, agora iha hela preparasaun nia laran no iha lei ne’e rasik hateten ona Governu iha tempu loron 180 atu halo deseminasaun ba munisípiu sira molok halo implementasaun.
Notísia Relevante: Membru PN husu Governu kontrola loja xineza imita dezeñu tais
Jornalista : Tomé Amado
Editór : Cancio Ximenes
