iklan

NASIONÁL, EKONOMIA, HEADLINE

Fundu Minarai sa’e ba biliaun $17,4 iha trimestre ikus

Fundu Minarai sa’e ba biliaun $17,4 iha trimestre ikus

DILI, 09 fevereiru 2023 (TATOLI) – Banku Sentrál Timor-Leste (BCTL, sigla portugés) lansa relatóriu trimestrál Fundu Minarai ba trimestre ne’ebé termina iha 31 dezembru 2022, ne’ebé hatudu kapitál fundu nian iha trimestre ikus ne’e sa’e ba biliaun $17,4, kompara ho trimestre anteriór biliaun $16,9.

“Relatóriu ne’e mós hatudu katak totál reseita mak simu iha trimestre ne’e hamutuk millaun $429.942”, refere nota ne’ebé Agência Tatoli asesu, kinta ne’e.

Rendimentu brutu husi investimentu fundu nian hamutuk pozitivu millaun $537.659 kompostu husi kupaun no dividendu ne’ebé simu mak millaun $84.09, mudansa iha valór merkadu nian positivu millaun $429.708 no movimentu cambiais mak pozitivu millaun $23.86 iha trimestre refere.

Notísia relevante : https://tatoli.tl/2022/11/09/fundu-mina-rai-trimestre-ikus-ho-kapital-biliaun-1691/

“Ne’e rezulta rendimentu ba karteira fundu nian durante trimestre ne’e 3.13%, enkuantu rendimentu sasukat ka benchmark nian ba periodu ne’e mak 3.13%”, komunikadu ne’e afirma.

Banku sentrál jere ona portofóliu besik liu ho pontu referénsia iha trimestre dala 70 dahuluk, diferénsia entre retornu totál portofoliu no pontu referénsia iha períodu ne’e 0.00 ponto de base ou 0 % no dezempeña retornu fundu nian hahú husi inísiu mak 4%.

Pontu importante husi Relatóriu Trimestre ba dala LXV ne’ebé kobre períodu 01 outubru to’o  31 dezembru 2022, inklui kapitál fundu mak biliaun $17,4. Osan kontadu brutu fundu ne’ebé tama husi kontribuisaun kontribuinte, hamutuk mak millaun $429.942.

“Nune’e, osan kontadu líkidu ne’ebé sai hosi fundu durante trimestre ne’e hamutuk millaun $552.165 kompostu hosi millaun $550 transfere ba Orsamentu Jerál Estadu (OJE) no millaun $2.165 ba kobre kustu jestaun”, afirma.

Rendimentu portofóliu instrumentu merkadu finanseiru iha periodu ne’e mak 3.27% kompara ho rendimentu referénsia 3.21%.

Jornalista: Antónia Gusmão

Editora:  Maria Auxiliadora

iklan
iklan

Leave a Reply

iklan
error: Content is protected !!