iklan

EKONOMIA, HEADLINE

Fundu mina-rai trimestre ikus ho kapitál biliaun $16,91

Fundu mina-rai trimestre ikus ho kapitál biliaun $16,91

Atividade iha kampu petrolífera, Bayu-undan. Imajen/Espesiál

DILI, 09 novembru 2022 (TATOLI)–Banku Sentrál Timor-Leste (BCTL, sigla portugés) lansa relatóriu trimestrál fundu mina-rai ba trimestre ne’ebé termina iha loron 30 setembru 2022, ne’ebé hatudu kapitál ikus biliaun US$16,91 kompara ho fim trimestre dahuluk ho montante biliaun $17,84.

“Relatóriu ne’e hatudu katak totál reseita ne’ebé simu iha trimestre ne’e hamutuk millaun $93,99,” refere nota ne’ebé Agência Tatoli asesu, kuarta ne’e.

Rendimentu brutu investimentu fundu hamutuk millaun -$617,13 kompostu hosi kupaun no dividendu ne’ebé simu millaun $70,14, mudansa iha valór merkadu millaun -$678,74 no movimentu cambiais millaun -$8,53 iha trimestre ne’e.

“Ne’e rezulta rendimentu ba karteira fundu nian durante trimestre ne’e -3,48%, enkuantu rendimentu sasukat ka benchmark ba períodu ne’e -3,71%,” nota ne’e subliña.

Notísia relevante: Fundu mina-rai trimestre daruak tun ba biliaun $17,84

Tuir lei fundu mina-rai, jestór operasionál BCTL mak hanesan ajente responsável ba jestaun operasionál fundu mina-rai, ne’ebé Ministériu Finansa mak responsabiliza atu estabelese estratejia investimentu tomak kona-ba fundu.

Banku Sentrál Timor-Leste jere ona portofóliu besik liu ho pontu referénsia iha trimestre da-VIIX, diferensia entre retornu totál portofóliu no pontu referénsia iha períodu ne’e maka 0,23% no dezempeña retornu fundu hahú hosi inísiu 3,86%.

Pontu importante hosi relatóriu trimestre da-LIX, ne’ebé kobre períodu 01 jullu to’o loron 30 setembru 2022, inklui kapitál fundu mak biliaun $16,91. Osan kontadu brutu fundu ne’ebé tama hosi kontribuisaun kontribuinte hamutuk millaun $93,9.

Nune’e, osan kontadu líquidu ne’ebé sai hosi fundu durante trimestre ne’e hamutuk millaun $407,6 kompostu hosi millaun $404 transfere ba Orsamentu Jerál Estadu (OJE) no millaun $3,6 ba kobre kustu jestaun.

Rendimentu totál portofóliu fundu nian iha trimestre ne’e mak -3,48% enkuantu rendimentu sasukat ka benchmak iha períodu ne’e -3,71%. Rendimentu portofóliu instrumentu merkadu finanseiru iha períodu ne’e -3,68% kompara ho rendimentu referénsia 3,92%.

VIII Governu Konstitusionál liuhosi Ministériu Finansa to’o iha inísiu novembru 2022, halo ona levantamentu osan hosi fundu mina-rai ho montante biliaun $1,3 ka 53% hosi totál biliaun $2,55 ne’ebé mak Parlamentu Nasionál aprova ona liuhusi Lei OJE Retifikativu 2022.

Jornalista   : Antónia Gusmão

Editora       : Julia Chatarina

iklan
iklan

Leave a Reply

iklan
error: Content is protected !!