iklan

NASIONÁL, DILI, POLÍTIKA

Taur mehi Dili sai furak, populasaun bahat Dili sai sabraut

Taur mehi Dili sai furak, populasaun bahat Dili sai sabraut

Komunidade ne'ebé hela besik área risku ba dezastre no hela iha mota-ninin, iha Manleu, Dili, sesta (20/01). Imajen Tatoli/Francisco Sony.

DILI, 08 janeiru 2023 (TATOLI)–Primeiru-Ministru (PM), Taur Matan Ruak,iha mehi boot atu halo sidade Dili sai furak liuihosi mestre planu ba ordenamentu sidade Dili ne’ebé nakfilak sidade Dili sai sidade “matak” no sidade “dame”.

Notísia Relevante: Kapitál Dili ho nia istória

Atu halo sidade Dili hatuur-an nabilan hanesan “paraisu” ba turista sira mai hosi rai-li’ur no rai-laran, VIII Governu halo ona preparasaun ba mestre planu ba ordenasaun sidade Dili, ho mehi ida katak iha Metinaro sei sai fatin espansaun hosi Dili mai iha parte Leste ne’e.

Nune’e, bainhira iha ona planu rekualifikasaun sidade Dili, edifísiu Parlamentu Nasionál mós sei muda sai hosi Dili, Universidade Estatál sira sei ba hotu Aileu no portu Dili muda ona ba Tibar-Liquiça.

Primeiru-Ministru Taur Matan Ruak. Imajen Tatoli/Francisco Sony

“Ho nune’e, neineik-neineik sei iha kondisaun ida di’akliu hodi halo abitasaun fatin ka uma ba família 2000, sira atu hela iha Metinaro no Tasi-Tolu, atu iha futuru sidade Dili bele sai fatin ida furak. La’ós sidade Dili ida hanesan agora ne’e, kuaze iha mota ibun no rai-lolon sira ne’e ema okupa hotu halo sidade Dili nia oin ne’e sai estraga hotu,” Primeiru-Ministru, Taur Matan Ruak, hateten liuhosi diskursu iha serimónia inaugurasaun ba eskola Tékniku Vokasionál, Maria Regina Guterres, iha Wenunuk, Metinaro, tersa (31 janeiru 2023).

Xefe Governu nia preokupasaun kona-ba populasaun harii uma iha mota ibun no rai-lolon ne’ebé  estraga sidade Dili nia oin ne’e, agora sai tebes realidade. Hosi odamatan boot iha parte loromonu, iha Tasi-Tolu-Dili ne’ebá, matan hateke ba rai-lolon iha fatin protejida Tasi-Tolu ne’e, populasaun harii uma hatuur-an hanesan bani nia knuuk tara-an iha ai-hanek nia sanak sira.

Hateke fali ba Tasi-Tolu be nalihun-an iha área protejida ne’e, eh, populasaun sira hahú konstrui uma besik-loos iha tasi ne’e nia ninin, no haree kois atu hanesan “Tasi-Tolu” ne’e atu lakon nia orijinalidade.

Pior liu, ho populasaun sira-ne’e nia hahalok “Tasi-Tolu” ne’ebé sai fatin ba komemorasaun loron nasionál sira (20 maiu) no fatin turizmu relijiozu ne’e, sai fali fatin turizmu ba timoroan sira-ne’ebé mai hosi munisípiu nia hela fatin.

La helik tan, nune’e ka la nune’e, “Tasi-Tolu” ne’ebé kuñesidu sai fatin Amo Papa João Paulo II selebra misa seolene iha ninia vizita mai Timor-Leste iha 12 outubru 1989, no Governu identifika sai fatin turizmu relizioju ne’e, daudaun ne’e sai fali ba joven sira atu “reza hymne domin nian” no hetok sai fatin ba populasaun sira hodi treinu motor no karreta.

Tebes ka lae, loos ka la loos, ho populasaun sira-nia hahalok no lahóo konxiénsia harii uma iha rai-lolon “Tasi-Tolu” no konstrui uma besik-loos iha “Tasi-Tolu” nia ninin ne’e, bainhira udan monu rai (04 abríl 2020) rezulta inundasaun bee tama populasaun nia uma no halo “Tasi-Tolu” ne’e lakon no nakfilak-an sai lagoa boot ida. Tasi-Tolu sai fatin protejida no sai fatin turizmu relijiozu ne’e, nia oin sai sabraut.

Labele harii uma iha fatin risku

Nakait ho kalamidade ne’ebé hamosu dezatre natural iha 04 abríl 2020 ne’e, Governu Timor-Leste liuhosi Autoridade Munisípiu Dili (AMD) implementa ona lei (2003/ 2018) hodi hatun orientasaun ba estrutura iha suku no aldeia sira atu kontinua fó hanoin ba komunidade, liu-liu iha área risku atu labele hari uma k iha fatin sira ne’ebé AMD detekta ona risku.

Komunidade konstrui uma besik tasi-ibun Bebonuk, kinta (19/01/2023). Imajen Tatoli/Francisco Sony.

“Ida-ne’e, agora daudaun ita hatun orden ba suku no aldeia sira atu kontinua fó hatene ba komunidade atu labele halo uma iha fatin rsiku no fatin protejida,” Adjuntu Prezidente Autoridade Munisípiu (PAM), Dili, António Moniz Clau, informa ba Ajénsia Tatoli, iha nia kna’ar fatin.

Implementasaun lei 2003/2018 ne’e, Autoridade Munisípiu Dili halo rigór ba komunidade la’os atu sobu komunidade nia uma maibé fó hanoin no fanu sira-nia konxiénsia atu kuidadu an bainhira udan no mosu inundasaun.

Ba populasaun sira-ne’ebé la kumpre ba lei hodi hela nafatin iha fatin risku, AMD atu foti medida dahuluk atu haruka sira-muda sai hosi fatin risku.

Maske Governu autoriza atu vítima inundasaun sira labele fila hodi hela iha fatin risku, maibé daudaun ne’e populasaun sira nafatin harii uma iha rai-lolon, mota-ibun no fatin ne’ebé sai fatin risku ba dezastre naturál.

Iha realidade, sesta (20 janeiru 2023) fulan kotuk, tuir Agência Tatoli nia observasaun iha mota-ibun Comoro ne’e, hatudu momoos katak populasaun ka uma-kain 10 mak sei harii uma 10 iha loos mota Comoro nia laran no bronjong iha fali uma ne’e nia kotuk.

Todan liután no karik labele hanoin hetan too iha ne’ebá, populasaun iha Comoro harii uma iha bronjong leten no uma nia riin rua mós kuda-harii mota Comoro nia laran. Imajina, bee-mota boot no sulu-tebe makaes karik, bee-mota mak suli-sees ba ai-rin uma mian ka ai-riin mak sees-an ba bee-mota, nune’e labale rezulta vítima ba dazatre naturál.

Abitante iha mota-ibun Ponte Comoro III sai vitima ba impaktu inundasaun iha domingu (04/04). Imajen TATOLI/António Gonçalves.

La’os ne’e de’it! Maibé, iha fatin risku ba dezastre natural hanesan iha mota Comoro hahú hosi ponte três (III) nian to’o iha Kasnafar nian, populasaun sira nafatin harii uma besik mota ibun no rai-lolon sira-ne’e hanesan lia ida la kona sira.

Tanba ne’e, husu Autoriadde Munisípiu Dili (AMD) presiza halo kontrolu no fó sansaun ba populasaun sira-ne’ebé ulun moruk halo uma nafatin iha área risku no bele motiva sira oinsá hela iha fatin ne’ebé seguru no protejidu.

Nune’e, iha estabelesimentu estrutura orgánika ba Autoridade Protesaun Sivil hodi implementa ka ezekuta Lei Protesaun Sivil númeru 12/2020, 2 dezembru, hodi kriminaliza komunidade ne’ebé harii uma iha fatin risku ba dezastre naturál hanesan mota-ninin, foho lolon, tasi ninin no besik lagoa sira.

Iha Lei Protesaun Sivil númeru 12/2020, 2 dezembru, iha artigu 21 ko’alla kona-ba utilização do solo ka uza rai, fó biban ba protesaun sivil serbisu hamutuk ho instituisaun sira hanesan Dirasaun Nasionál Terras no Propriedade (DNTP), Ministériu Planu Ordenamentu (MPO), Sekretáriu Estadu Ambiente (SEA), atu bele halo medida prevensaun hanesan tau plaka hodi bele fó hatene ba komunidade ne’ebé hela iha fatin risku dezastre nian.

Iha fulan-jullu 2021 liubá, Autoridade Munisípiu Dili liuhosi Autoridade Komunitária halo ona sensibilizasaun ba komunidade atu fó hanoin katak haree referénsia ba kotuk hanesan iha 2020 no 2021 ne’ebé tama iha kalamidade kuaze labele resolve, entaun fó hanoin ba populasaun ne’ebé hela iha mota ninin, fohololon no tasi ibun atu sira kuidadu sirania an.

Tanba, Dekretu-Lei númeru 33/2008 bandu totál komunidade atu labele hela iha fatin risku hanesan mota ninin, fohololon no tasi ibun, tanba bele tau risku ba sirania an, maibé populasaun iha sidade Dili nia karáter nunka atu rona autoridade sira.

Tuir dadús ikus hosi Ministériu Administrasaun Estatál (MAE) relata katak, família hamutuk 2.558 mak daudaun ne’e hela iha área risku dezastre naturál iha munisípiu Dili, ne’ebé hela besik mota ninin, fohololon no lagoa ninin.

PM Taur husu komunidade atensaun ba dezastre naturál

Nakait ba dezastre naturál ne’ebé ekontese iha 2020 no 2021 ne’e. Primeiru-Ministru Taur Matan Ruak husu atensaun ba komunidade ne’ebé hela iha rai-lolon, mota-ibun no tasi-ibun atu kuidadu an hosi dezastre naturál ne’ebé akontese.

Komuniddade ne’ebé hela iha mota-ninin no mota-laran área Comoro nia uma hetan estragu hafoin udan boot iha foho Kasnafar, Aileu no Ermera halo bee-mota tuun hodi rezulta inundasaun, sesta (25/2/2022). Imajen TATOLI/António Dasiparu.

“Agora dadaun mensajen sira tama iha ita-nia telefóne barak liu mak meteorolójia nian katak koidadu ita-boot hela iha rai lolon karik koidadu ita-boot nia oan no hela iha mota ibun no tasi ibun karik kuidadu. Ida-ne’e hatudu katak iha tempu saida de’it dezastre tuku ita-nia odamatan, ne’ebé ita tenke atensaun,” Primeiru-Ministru (PM), Taur Matan Ruak, hateten.

Xefe Governu ne’e relata, iha 2020 estragus ne’e ekivalente ho osna karik  kuaze ultrapasa millaun $50, sidadaun sira-nia vida destroidu no iha 2021 pior liután tanba hetan estargu kuaze millaun $300 no barak seidauk konta.

Entretantu, hafoin inundasaun iha loron 04 abril 2021, ema hamutuk na’in-34 mak mate no na’in-14 mak lakon iha nível nasionál no mós familia hamutuk 30.322 mak afeta ba inundasaun. Ne’ebé, entre familia sira-ne’e iha familia 24.816 hosi munisípiu Díli no uma hamutuk 4.231 mak hetan estragu.

Hosi númeru ne’e, iha familia 130 mak hela iha sentru evakuasaun neen (6) ne’ebé kompostu hosi, sentru evakuasaun Dom Bosco iha vítima hamutuk 35, Hosi númeru ne’e iha familia 14 mak deside fila ona ba munisípiu orijinál no na’in-ualu (8) deside hela iha Díli, inklui mós familia 13.

Nune’e, iha sentru evakuasaun Bedik Hera iha familia 25, hosi númeru ne’e iha familia ida (1) deside fila ba munisipiu orijinál no familia 24 sei mantein iha Hera hodi hein desizaun Governu. Iha sentru evakuasaun EBC Hera iha familia 14, hanesan familia tolu (3) deside fila ba munisipiu orijinál no familia rua (2) deside hela iha díli, nune’e mós familia sia (9) sei hein desizaun Governu.

Iha sentru evakuasuan Kampu Real Madrid iha familia hamutuk 41 ne’e família 21 deside fila ba munisipiu orijinál, familia 15 hela iha Dili no lima (5) sei hein desizaun Governu. Iha sentru evakuasaun Rate Ain iha familia hitu (7), hanesan familia rua (2) fila ba munisipiu orijinál no lima (5) sei hein desizaun Governu. Enkuantu, iha sentru evakuasaun Restaurante Metiaut Vítoria iha familia ualu (8) ne’e família lima (5) deside hela iha Dili no familia tolu (3) sei hein desizaun Governu.

Dadus hirak ne’e reprezenta vítima dezatre naturál ne’ebé akontese iha sidade Dili iha tinan hirak liubá ne’e. Hein katak, Xefe Governu nia mehi halo sidade Dili sai furak ne’e la’ós de’it Primeiru-Ministru nia mehi mesak, maibé sidadaun hotu-hotu ne’ebé hela iha Dili ne’e nia mehi atu halo sidade Dili sai furak ne’e, ninia responsabilidade.

Nune’e, atu fiar ka la fiar, aiknanauk “Rai Dili, Rai Sidade” ne’e sai tebes realidade iha timoroan sira-nia matan no sai sidade ida-ne’ebé moos, matak, nabilan, seguru no nakonu ho dame hanesan lírika “Ai-kasi funan buras, halo Dili matak” tuir mai ne’e;

Rai Dili, rai sidade

Sé mak lahatene

Se ó la fiar karik

Hakat liu took mai

Ai-kasi funan buras

Halo Dili matak

Dili rai sidade sé mak liután ó

 

Hakarak la’o pasear

Ba rai-henek mutin

Se sente laran kma’an

Liu ba Tasi-Tolu

Tuir dalan ibun koko took ikan sabokon

Maibé sei furak liu habokon ho tua-mutin

 

Hakarak sa’e ba foho

Liu took ba Cablaki

Se sente laran kma’an

Liu ba Ramelau

Ai-funan no ai-talik

Nani tuir foho leten

Manu-fuik ai-laran

Moris ho hakmatek

Notísia Relevante:  Roman ‘osan-mean’ nabilan iha sidade Dili nia lidun 

Jornalista : Osória Marques 

Editór         : Cancio Ximenes

iklan
iklan

Leave a Reply

iklan
error: Content is protected !!