PN bolu urjente MS esplika kazu bebé mate iha ambulánsia laran
DILI, 10 fevereiru 2023 (TATOLI)—Sekretária Meza Parlamentu Nasionál (PN), Deputada Lídia Norberta, hateten PN hato’o ona karta hodi bolu urjente Ministra Saúde (MS), hodi esplika kona-ba kazu inan no bebé mate iha karreta ambulánsia laran bainhira transfere hosi Óspital Referál Maliana mai Hospitál Nasionál Guido Valedares (HNGV, siglá portugés).
Notísia Relevante: Deputadu PD lamenta médiku la akompaña inan isin-rua partu bebé mate
“Segunda-feira (13/02) reuniaun plenária ita sei halo debate ida ho Governu liu-liu Ministériu Saúde (MS) relasiona ho tratamentu ospitalár ne’ebé mak fó ba ita-nia inan isin-rua sira partu no disponibilizasaun ai-moruk iha ka lae, ida-ne’e mak ita hakarak debate ho Ministéiru Saúde,” Sekretária Meza PN ne’e hateten ba jornalista sira iha PN, sesta ne’e.
Antes ne’e, iha 06 fevereiru ne’e, liuhosi reuniaun plenária, Deputadu hosi bankada Partidu Demokrátiku (PD), Adriano do Nacimento, lamenta ho ospitál Maliana ne’ebé laiha akompañamentu médiku rezulta inan isin-rua partu bebé hakotu iis iha karreta ambulánsia laran bainhira transporta mai Dili.
Prezidente Parlamentu Nasionál, Aniceto Longuinhos Guterres Lopes, konsidera asuntu ne’e sériu, bankada Parlamentár no meza PN bele hato’o rekerimentu hodi bolu urjénsia Ministra Saúde halo esplikasaun klaru kona-ba situasaun refere.
Notísia Relevante: MS investiga ona kazu inan-oan mate iha kareta ambulánsia
https://tatoli.tl/2023/02/08/ms-investiga-ona-kazu-inan-oan-mate-iha-kareta-ambulansia/
Jornalista : Nelson de Sousa
Editór : Cancio Ximenes
