DILI, 13 fevereiru 2023 (TATOLI)—Deputadu hosi bankada FRETILIN iha Parlamentu Nasionál (PN), Alexandrino Cardoso, husu Ministéiru Obra Públika (MOP) atu tau ka normaliza gabiaun (bronjong) iha ponte Maligirik iha Ogues-Covalima.
Notísia Relevante: Kompañia Unidade halo ona normalizasaun ponte Maligirik iha Ogues
“Atu hato’o de’it kestaun estrada kotu udan boot iha semana liubá, iha munisípiu Covalima ne’ebé afeta hakotu ona ponte Maligirik ne’ebé liga postu Suai Vila ba postu Maucatar no kontinua ba postu Fatululik no postu Bobonaro, Lolotoe. Maibé ekipa IGE halo ona normalizasaun ne’ebé husu nafatin ba oin tenke tau gabiaun, atu nune’e udan mai karik labele hakotu tan,” Deputadu Alexandrino hateten liuhosi reuniaun plenária Parlamentu Nasionál, segunda ne’e.
Tanba, nia dehan, agora provizóriu ateru de’it rai no bainhira la tau gabiaun (bronjong) udan mak sei estraga fila-fali tán. No, agora tempu besik eleisaun parlamentár, agora partidu polítiku sira komesa ba iha baze hala’o atividade bele difikulta.
“Tan ne’e husu ba ministéiru relevante atu haree kestaun ne’e ho didi’ak,” nia hateten.
Deputadu hosi bankada Governu ne’e, hato’o mós nafatin ligasaun estrada iha postu Fatumea ne’ebé udan boot afeta ba rai halai hakotu tiha estrada ligasaun postu Fatumea ba iha suku Fatumea ne’ebé kontinua mós ba postu Fohorem.
“Entaun to’o agora, seidauk halo normalizasaun entaun difikulta tebes komunidade sira-ne’eba atu asesu hosi suku Fatumea mai iha postu Fatumea, nune’e mós hosi postu Fatumea atu asesu ba iha postu Fohorem. Nune’e, husu Ministéiru Obra Públika (MOP) atu lori ekipa pezadu ruma hodi normaliza,” nia hateten.
Ministru Asuntu Parlamentár no Komunikasaun Sosiál (MAPKOMS), Francisco Jerónimo, hateten kestaun kona-ba estrada no ponte ne’e, nia parte informa ba Ministru Obra Públika (MOP) atu tau atensaun hodi fó solusaun problema ne’ebé infrenta liu-liu iha tempu emerjénsia ne’e.
Notísia Relevante: Ponte Maligirik iha Ogues ameasadu atu kotu
Jornalista : Nelson de Sousa
Editór : Cancio Ximenes
