DILI, 13 fevereiru 2023 (TATOLI)—Ministru Administrasaun Estatál (MAE), Miguel Pereira de Carvalho, husu ba autoridade lokál sira iha munisípiu Dili atu mobiliza komunidade hodi trata kartaun elitorál, nune’e bele ezerse sira-nia direitu votu iha Elisaun Parlamentar (Elpar) 2023.
Notísia Relevante: Resensiamentu eleitorál iha diáspora sei hahú 24 fevereiru 2023
“Ita la kle’ur tan sei tama ba iha elisaun parlamentár, ha’u hakarak hato’o mansajen ba líder komunitáriu sira iha postu administratitu Cristo Rei, munisípiu Dili atu nafatin mobiliza komunidade ba trata kartaun elitorál hodi nune’e bele hasoru elisaun parlamentár tinan 2023 ninian,” Governante ne’e hateten bainhira hala’o lansamentu ba Uma Naroman ba Povu (UNP), iha suku Camea, Cristo Rei, segunda ne’e.
Maibé, nia dehan, presiza ema hotu nia kontribuisuan hodi garante estabilidade iha ida-idak nia aldeia no suku sira.
“Ha’u-nia mensajen simplés de’it, ita hotu-hotu presiza garantia estabilidade iha ita-nia suku no aldeia ida-idak, mobiliza ita-nia populasaun sira atu ba tuir resensiamentu elitóral hodi hala’o atulizasaun baze dadus,” nia dehan.
Tanba, tuir nia, ohin loron Sekretáriadu Tékniku Administrasaun Eleitorál (STAE) hala’o hela resensiamentu no atualizasaun baze dadus iha postu administrativu sira hotu-hotu.
“Husu ba sidadaun sira-ne’ebé atu ba vota bele hala’o resensiamentu iha postu Aaministrativu sira, hodi nune’e bele atualiza ita-boot sira-nia dadus iha sistema. Iha biban ida-ne’e ha’u mós husu ba katuas-ferik sira katak balun ne’ebé seidauk iha kartaun elitorál bele hakbesik-an ba postu administrativu sira atu bele halo resensiamentu. Resensiamentu ne’e importante tebe-tebes atu nune’e imi bele goja imi-nia diréitu ba vota iha eleisaun parlamentár 2023 mai,” nia hateten.
Ministru ne’e mós husu ba lider komunitáriu no populasaun sira atu ezerse direitu votu iha elisaun parlamentár ho másimu no garantia estabilidade hosi aldeia, suku, postu administrativu no to’o munisípiu sira, nune’e elisaun parlamentár tinan 2023 ida-ne’e bele la’o ho hakmatek no dame iha Timor-Leste.
Notísia Relevante: STAE apela ba sidadaun TL partisipa iha resensiamentu eleitorál
Jornalista : Osória Marques
Editór : Cancio Ximenes
