PN hato’o votu pezár ba vítima rihun 30-resin mate iha Turkia-Síria
DILI, 13 fevereiru 2023 (TATOLI)—Parlamentu Nasionál (PN) liuhosi reuniaun plenária, segunda ne’e, aprova votu pezár no solidariedade ba vítima ne’ebé lakon vida rihun 30-resin tanba rai nakdoko iha Turkia no Síria.
Notísia Relevante: Prezidente Repúblika hato’o solidariedade ba povu no Governu Turkia-Síria
“Rezultadu votasaun a-favór 29, kontra no abstensaun laiha, nune’e votu númeru 3/V(5a)-votu pezár no solidariedade ho vítima terramoto ne’ebé akontese iha Turkia no Síria aprovadu,” Prezidente Parlamentu Nasionál, Aniceto Longuinhos Guterres Lopes, hateten iha sala plenária PN.
Tuir testu votu pezár ne’e katak, iha 06 fevereiru 2023, violentu sísmu ho magnitude 7,8 iha eskala richter, ho violenta replika, ne’ebé atinje magnitude 7.6 atinji iha sudeste Turkia, ho efeitu devastadór iha área Turkia no Síria.
Tuir dadus ofisiál ikus rejista momentu ne’e ema rihun 30 mak mate iha Turkia no ema 3500 iha Síria.
Nune’e, PN esprime nia pezár akontesimentu katastrófiku, manifesta solidariedade ho vítima no povu ho autoridade Turkia no Síria, hato’o mós sentidu kondolénsia ba família enlutada.
Votu pezár ne’e hato’o hosi Deputada Fretilin, Lídia Martins, David Dias Ximenes ‘ Mandati’ no Deputada Frente Mudansa, Isabel Ximenes.
Notísia Relevante: Timor-Leste hato’o solidariedade ba Turkia no Síria
Jornalista : Nelson de Sousa
Editór : Cancio Ximenes
