DILI, 14 fevereiru 2023 (TATOLI)—Parlamentu Nasionál (PN), tersa nee’e, liuhosi reuniaun plenária aprova proposta alterasaun lei Eleitorál ba Parlamentu Nasionál iha finál globál.
Notísia Relevante: PN aprova alterasaun lei Eleitorál ba PN iha jeneralidade
“Rezultadu votasaun a-favór 38, kontra no abstensaun 0, nune’e proposta lei númeru 50/V(5a)- alterasaun dalimak lei númeru 6/2006, 28 dezembru, ne’ebé aprova Lei Eleitorál ba Parlamentu Nasionál nian aprovadu,” Prezidente Parlamentu Nasionál, Aniceto Longuinhos Guterres Lopes, hateten iha sala plenária, PN.
Ho aprovasaun ne’e meza husu komisaun A trata asuntu Justisa no Konstituisionál atu halo redasaun finál iha kuarta (15/02) dadeer no nune’e iha lorokraik meza bele envia ba Prezidente Repúblika atu hetan promulgasaun.
Prezidente Parlaamentu Nasionál ne’e agradese ba Deputadu sira-nia serbisu hanesan lejisladór hodi aprova ona lei ne’e no agradese mós parte Governu.
Tuir relatóriu paresér komisaun A katak prezente relatóriu no testu rezultante diskusaun no votasaun iha espesialidade aprova iha reuniaun komisaun iha loron 13 fevereiru 2023 ho votu a-favór neen (6), kontra no abstensaun 0, nune’e remete ba votasaun finál globál, tuir termu númeru 2 iha artigu 111 rejimentu PN.
Alterasaun lei Eleitorál ne’e Governu introdús medida foun sira hanesan estabelese sentru votasaun paralelu iha Dili no medida eleitór sira sei ba rejista direta iha STAE, estabelese povu postál iha rai-li’ur, jornalista sira bele vota livre bainhira tempu eleisaun hala’o funsaun sira iha ne’ebé de’it, oráriu eleisaun, monitór observadór iha eleisaun, kria kondisaun ba ema ho defisiénsia atu bele partisipa di’ak liután iha eleisaun.
Prezidente Komisaun A, Joaquim dos Santos, hateten bainhira proposta lei ne’e hetan promulgasaun hosi Prezidente Repúblika (PR) mak sei tama vigór utiliza ba eleisaun parlamentár 2023.
Deputadu PD, Adriano do Nascimento, husu Governu atu iha kapasidade implementa lei ne’e bainhira hetan promulgasaun hosi Prezidente Repúblika.
Ministru Administrasaun Estatál (MAE), Miguel Ferreira de Carvalho, agradese ba Komisaun A hamutuk ho Governu ne’ebé halo diskusaun ba proposta alterasaun lei ne’e iha espesialidade ba artigu sira to’o ohin mai iha finál globál.
Alterasaun ne’e ho razaun atu armoniza lei Eleitorál Prezidente Repúblika ho Lei Eleitorál ba PN no hasa’e taxa partisipasaun eleitór iha eleisaun mai, nune’e Governu hanoin importante tebes Deputadu sira aprova iha finál globál.
Governante ne’e, dehan bainhira lei ne’e aprova hosi Xefe Estadu nia implikasaun ita sei uza lei ida-ne’e no ba STAE utiliza iha eleisaun Parlamentár 2023.
Nia hateten, proposta lei promulga mós laiha implikasaun relasiona ho prosesu eleitorál tomak mezmu PR dekreta ona loron eleisaun parlamentár, hanesan prosesu aprezentasaun kandidatu ne’ebé ohin hahú loron dahuluk efeitu, tanba laiha alterasaun ruma ba iha artigu ba aprezentasaun kandidatura.
Ministru ne’e hateten, sei identifika votu postál presiza prepra ho didi’ak, kona-ba lojistika no téknika preparadu atu organiza hodi realiza eleisaun ne’ebé Xefe Estadu dekreta ona loron eleisaun iha 21 maiu 2023.
Notísia Relevante: PN aprova alterasaun lei Eleitorál bele uza ba Elpar
Jornalista : Nelson de Sousa
Editór : Cancio Ximenes
