DILI, 15 fevereiru 2023 (TATIOLI) – Riando Fallo nia mate isin, daudaun ne’e, sei rai hela iha mortuáriu, Hospitál Nasional Guido Valadares (HNGV) hodi submete ba autopsia.
Diretór Ezekutivu Interinu Hospitál Referál Maubesi Plasido da Costa, informa ospitál referál liuhosi departamentu emerjénsia ambulatóriu halo ezaminasaun ba matebian Riando Fallo maibé nia laiha ona.
“Ita nia sidadaun ne’e tama mai Ospitál Maubesi, iha tuku 11:25 kalan, lori husi ekipa seguransa sira ho nia objetivu mai Ospitál Referál Maubessi atu konfirma katak ita nia sidadaun ne’e sei moris ka la’e maibé to’o mai iha ospitál la iha ona sinal moris”, Plasido da Costa dehan husi via telephone, ohin.
Nia informa, ekipa médiku liuhosi departamentu emerjénsia ambulatóriu halo ezaminasaun hafoin justifika ho mákina diagnóstika katak matebian ne’e tama iha Ospitál Maubesse laiha ona sinál moris.
“Ita nia sidadaun ne’e hakotu is iha dalan ka oinsá, parte Ospitál la hatene, maibé pasiente ne’e tama mai iha internamentu laiha ona sinál moris, ne’ebé hatudu katak iis laiha no fuan la book aan ona”, nia konklui.
Notísia relevante : Ekipa hetan-evakua joven ida lakon iha Ramelau mai Ospitál Maubisse
Jornalista : Felicidade Ximenes
Editór : Zezito Silva
