CCLN Bobonaro lamenta ho prezensa kompañia Miramar iha Manu Kaitete
BOBONARO, 16 fevereiru 2023 (TATOLI)-Vise Konsellu Kombatente Libertasaun Nasionál (CCLN, sigla portugés) munisípiu Bobonaro, Lúcio Dinis Marques ‘Onsar’, lamenta ho prezensa kompañia Maramar Unipesoál Lda ne’ebé ba direitamente kaer obra iha área Manu-Kaitete baliza entre postu administrativu Maliana no Cailaco sein halo koordenasaun ho parte na’in ba rai.
Veteranu ‘Onsar’ haktuir, rai refere dezde tempu kolonializmu portugés nian kedas disputa entre postu administrativu Cailaco no Maliana, maibé veteranu Bobonaro oan halibur malu tau osan hamutuk depois bolu lia-na’in sira halo kultura hodi rezolve, to’o ikus governu deside entrega ba CCLN munisípiu Bobonaro nu’udar na’in ba rai ektare 80 ne’e.
Nia subliña, antes ne’e CCLN Bobonaro hamutuk ho tékniku agraria ba sukat hotu ona no daudaun ne’e sei iha hela prosesu nia laran atu entrega dokumentu.
Notísia relevante: Governu-Veteranu Bobonaro deside harii jardín eroi iha Manapa
“Ministru haruka kompañia mai, la koordena ho ami, tama direitamente de’it, ida-ne’e mak ami ladún satisfas ho situasaun sira hanesan, ne’e mak até agora ami paradu hela, ami sei la ba haree kontrola no hatudu fatin ne’ebé, agora sira halo konforme sira-nia hakarak,” nia informa ba jornalista sira, iha kna’ar-fatin, kinta ne’e.
Nia haktuir, iha loron 06 fulan-dezembru tinan kotuk kompñia Mira-Mar hato’o de’it karta koñesimentu katak manán ona konkursu aterru fatin jardín eroi iha rai Manu-kaitete.
Hafoin ida-ne’e empreza refere mobiliza kedas ekipamentu pezadu ba halo servisu iha terrenu.
“Ami la ezije kompañia atu fó buat ruma ba ami, ami presiza de’it koordenasaun,” nia katak.
Maibé Lúcio Dinis kontaktu ona enjeñeiru kompañia Miramar atu koordena malu nune’e iha tempu badak bele halo koordenasaun di’ak.
Veteranu ne’e husu ba Ministériu ha Asuntu Kombatente Libertasaun Nasionál atu implementa lalais projetu konstrusaun jardín eroi iha fatin ne’e.
“Ita-nia preokupasaun mak restu mortál sira ne’e tenke tau iha fatin didi’ak, tanba agora rai iha ossoario mós ladún di’ak, kaisaun sira-ne’e mós balun aat ona, uma mos ladi’ak, ne’ebé ita barak ka lakohi tenke halo duni jardín eroi, tanba mate sira-ne’e ita ba sukit iha Aileu no fatuk leet sira-ne’e atu hakoi, la’ós ami sei hela de’it hanesan ne’ebá,” Onsar afirma
Fatin refere CCLN halo proposta ba VIII governu konstitusionál tau liu prioridade atu harii jardín do eroi ba martir sira-nia restu mortál ne’ebé tau hela iha ossoario Odomau, Maliana no ida iha postu administrativu kuaze 800.
Nune’e planu ba futuru atu halo dezenvolvimentu barak hanesan harii universidade kompletu ho dormitóriu estudante, nafatin harii kooperativa inklui halo semitériu tanba semitériu Santa Cruz, Maliana nakonu ona.
Notísia relevante: SEAKLN enkoraja veteranu nia oan iha Bobonaro kontinua eskola
Jornálista: Sérgio da Cruz
Editór: Evaristo Soares Martins
