DILI, 16 fevereiru 2023 (TATOLI)—Estudante ida hosi eskola Canossa, Sancho Junior de Caprio Moniz, hateten labarik sira dala barak mak sai vítima bainhira inan-aman sira divórsiu ka fahe malu no sai vítima ba direitu alimentasaun.
Notísia Relevante: Governu presiza luta garante labarik sira-nia direitu
“Ami labarik sira dala barak sai vítima tanba bainhira inan-aman divórsiu ka fahe malu. Ami sai tan vítima ba dala rua bainhira atu trata ami-nia direitu alimentasaun hosi inan aman iha sistema justisa nian,” Sancho Junior hato’o preokupasaun ne’e liuhosi diálogu nasionál ne’ebé realiza hosi INDDICA entre líder nasionál, membru Parlamentu Nasionál, membru Governu no parseiru dezenvolvimentu ho tema jerál “Rona ami labarik nia lian hodi asegura no realiza mi nia direitu” iha Sentru Konvensaun Dili (CCD, sigla portugés), kinta ne’e.
Nia dehan, bai-bain atu hetan de’it alimentasaun ne’e, han tempu kle’ur loos no mós komplikadu tebes tanba presiza sertidaun hosi inan-aman maibé iha balun aman ka inan lakohi atu fó sira-nia dokumentu entaun ne’e difikulta no lori labarik sira mak sai vítima.
“Ami rasik la brani atu ba husu, nune’e ami hanesan sai tan vítima dala rua iha sistema justisa. Oinsá Govemu haree ba asuntu ida-ne’e,” nia dehan.
Vise Ministériu Solidariedade Sosiál no Inkkuzaun (MSSI), Signi Chandrawati Verdial, hateten MSSI servisu hamutuk ho UNICEF halo ona formasaun hametin família, tanba ohin alin sira hateten bainhira nia inan-aman sira fahe malu, oan sira sai vítima, ida-ne’e halo ona pilotu munisípiu haat, parseiru hamutuk ho UNICEF.
“Ita sei alarga tan programa ida-ne’e ba munisípiu sira seluk oinsá ita reforsa família ida tenke forte hodi nasaun bele forte. Ita prevene situasaun sira-ne’ebé ohin alin sira temi, ita-nia númeru inan-aman sira divórsiu ka fahe malu mós boot. Ida-ne’e ladi’ak ba ita-nia nasaun no oan sira sai vítima. Projetu pilotu ida-ne’e ho UNICEF, ita servisu ona no sei kontinua nafatin ba oin,” nia hateten.
Notísia Relevante: PN aprova projetu-lei protesaun ba labarik iha finál globál
Jornalista : Osória Marques
Editór : Cancio Ximenes
