Profesór voluntáriu 50-resin hato’o ona reklamasaun ba DSEM Liquiça
DILI, 16 fevereiru 2023 (TATOLI)–Diretór Servisu Edukasaun Munisípiu Liquiça (DSEML) Carlos Lopes, hateten profesór voluntáriu 50-resin ne’ebé la pasa iha prosesu selesaun dokumentu iha Munisípiu Liquiça hato’o ona sira-nia reklamasaun ba Dirasaun Servisu Edukasaun Munisipál atu submete mai nasionál.
Notísia Relevante: MEJD sei simu reklamasaun hosi profesór voluntáriu 1.371
“Horisehik no ohin, ami alista ona iha totál profesór voluntáriu hamutuk 50-resin mak hatama ona sira-nia reklamasaun. Ha’u hanoin, segunda hanesan ne’e bele ramata ona,” Diretór Carlos Lopes hateten ba Agência Tatoli liuhosi telefónika, kinta ne’e.
Antes ne’e, nia dehan, iha totál profesór voluntáriu iha Liquiça hamutuk 239 mak submete sira-nia dokumentu maibé depois ekipa painél juri halo tiha selesaun ba dokumentu sira-ne’e, kuaze profesór na’in-56 de’it mak hetan konsiderasaun hodi hakat ba kontratadu.
Ho nune’e, kuaze profesór hamutuk 183 mak la admitidu no agora daudaun ne’e iha ona profesór hamutuk 50-resin mak submete ona sira-nia reklamasaun eskrita ba edukasaun munisipál atu hetan konsiderasaun hosi Ministru Edukasaun Juventude no Desportu.
Bainhira prosesu reklamasaun hosi profesór voluntáriu na’in-183 iha Liquiça ne’e mak hotu ona, dirasaun Servisu Edukasaun Munisipál sei submete reklamasaun sira-ne’e ba Ministériu Edukasaun.
“Durasaun tempu ba profesór voluntáriu sira-ne’ebé la pasa ne’e iha de’it loron 15, kerdizér sei to’o data 28 fevereiru 2023. Liu ida ne’e, prosesu simu reklamasaun sei taka, atu nune’e dirasaun bele prepara mós nota akompañamentu ida atu reforsa reklamasaun sira-ne’e hodi dirije ba Ministru Edukasaun,” nia dehan.
Dadus Ministériu Edukasaun Juventude no Desportu nian ne’e hatudu katak prosesu rekrutamentu no selesaun ba profesór voluntáriu la’o kuaze tempu naruk, hahú hosi 2021 mai to’o 2022 no tama iha 2023 mak foin anúnsia rezultadu sira ne’e.
Antes ne’e, iha totál dokumentu profesór voluntária hamutuk 2.910 hosi Munisípiu 13 la inklui Rejiaun Administrativu Espesiál Oé-Cusse Ambeno (RAEOA) mak Ministériu Edukasaun Juventude no Desportu (MEJD) halo ona selesaun.
Hosi prosesu selesaun dokumentu ne’ebé ekipa painél juri hosi MEJD halo ne’e konsidera iha de’it totál dokumentu hamutuk 1.539 mak prenxe kritériu no dokumentu hamutuk 1,371 la admitidu.
Hosi totál dokumentu hamutuk 1.539 admitidu ne’e depois aumenta tan ho profesór 176 ho programa eskola iha uma ne’e mak sa’e ba 1.715 mak muda sira-nia estatutu voluntáriu hodi kontarata sai profesór kontratadu.
Nune’e totál profesór voluntáriu 1,715 ne’ebé hakat ona ba kontratadu ne’e konsidera mai hosi eskola Pre-Eskolár (EPE) hamutuk na’in-121, Ensinu Báziku (EB) hamutuk na’in-894, Ensinu Sekundáriu Jerál (ESG) hamutuk na’in-398, Ensinu Sekundáriu Tékniku Vokasionál (ESTV) hamutuk na’in-126 no edukasaun programa eskola iha uma hamutuk profesór na’in-176.
Notísia Relevante: MEJD kontrata ona profesór voluntáriu 1.715 sai profesór kontratadu
Jornalista : Tomé Amado
Editór : Cancio Ximenes
