BOBONARO, 20 fevereiru 2023 (TATOLI) – Komandante Polísia Nasionál Timor-Leste, munisípiu Bobonaro, Superintendente Antoninho Mauluta, husu ba joven sira atu koopera ho membru polísia sira hodi kontribui ba pás no estáblidade iha eleisaun Parlamentár ne’ebé mak tuir kalendariu sei realiza iha loron 21 fulan-maiu tinan ne’e.
Notísia relevante: STAE Bobonaro fó teste eskrita ba kandidatu brigadista 356
“Hosi komandu atu rai hela lia-menon ba iha komunidade tomak iha munisípiu ida ne’e primeiru tenke hamutuk, tanba munisípiu ida-ne’e atu di’ak la’ós polísia de’it, maibe atu di’ak iha PNTL no mós komunidade tomak nia liman, oinsá ita hamutuk atu asegura munisípiu ida ne’e ba oin,” nia informa ba Jornalista sira, iha Maliana, segunda ne’e.
Komandu polísia munisípiu Bobonaro mós sei bolu lideransa organizasaun arte-marsiál sira hotu atu apoia serbiosu PNTL no asegura situasaun, hahú hosi kampaña eleitorál to’o rezultadu eleisaun, nune’e la’ó ho ambiente hakmatek.
“Oinsá tama kampaña karik, sira-nia kontribuisaun, atu ita asegura ita-nia munisípiu ida-ne’e to’o ikus ita-nia munisípiu nune’e naran bele morin ba to’o nasionál, tanba atu di’ak ka la di’ak la’ós PNTL de’it, ita Bobonaro oan hotu nian,” nia informa.
Tuir dadus membru efetivu PNTL munisípiu Bobonaro hamutuk 147 mak preparadu atu asegura situasaun seguransa durante kampaña no eleisaun parlamentár.
Enkuantu, númeru eleitór iha territóriu nasionál to’o iha fulan-dezembru 2022 hamutuk 878.712 ne’ebé kompostu hosi Aileu 34.706, Ainaro 46.945, Ataúro 2.600, Baucau 98.629, Bobonaro 72.811.
Nune’e mós Cavalima 48.830, Dili 192.934, Ermera 84.361, Lautém 49.380, Liquiçá 51.925, Manatuto 35.999, Manufahi 41.574, RAEOA 53.151 no Viqueque iha eleitór hamutuk 58.867.
Entretantu eleitór ne’ebé agora resensiadu no atualizadu iha diáspora hamutuk 6.944 ne’ebé komposta hosi Austrália iha eleitór hamutuk 1.462, Korea Súl 1.237, Irlandia Norte 2.185, Portugál 1.241 no Reinu Unidu iha eleitór hamutuk 819.
Notísia relevante: CNE Bobonaro sei rekruta ofisiál supervizaun eleitorál 167
Jornálista : Sérgio da Cruz
Editór : Evaristo Soares Martins
