EDTL, E.P rejista sentru venda pulsa eletrisidade 16 iha Covalima
COVALIMA, 21 fevereiru 2023 (TATOLI)—Eletricidade de Timor-Leste, Empreza Públiku (EDTL, E.P) rejista sentru venda pulsa eletrisidade hamutuk 16 ne’ebé estabelese iha munisípiu Covalima.
Notísia Relevante: EDTL, E. P sei estabelese sentru venda pulsa eletrisidade iha suku
“Ami rejista sentru venda pulsa hamutuk 16 ne’ebé estabelese bazea ba kliente-sira haruka karta ba EDTL, E.P hodi husu lisensa atu faan pulsa eletrisidade iha munisípiu Covalima,” Xefe Unidade EDTL, E.P Covalima, Alexandre Seran, hateten ba Agência Tatoli, iha nia kna’ar fatin, Bairru Wematan, tersa ne’e.
Kritéria atu estabelese sentru venda pulsa eletrisidade mak hanesan kliente sira haruka karta pedidu ba iha EDTL, E.P nasionál hodi dirije ba prezidente EDTL, E.P atu halo prosesu durante semana ida.
Hafoin halo prosesu, EDTL, E.P sei telefone ba kliénte sira atu lori sira-nia laptop, modem no printer hodi rona esplikasaun kona-ba regra faan pulsa eletrisidade hodi faan pulsa iha munisípiu Covalima.
Sentru venda pulsa eletrisidade estabelese Covalima mak hanesan iha wematan Suai ne’e iha sentru rua (2), Camnasa Tuaderek Suai iha sentru rua (2), Sukabilaran, Leogore, Suai, Ai-taman Maudemo, suku Beco, Maucatar, Ogues, suai, Santa Rosa Suai, Tabakolot, Fatumea iha Bairru Costa no Zumalai Kampung Baru.
Notísia Relevante: EDTL,E.P estabelese ona sentru venda iha nivel nasional hamutuk 454
Jornalista : Celestina Teles
Editór : Cancio Ximenes
