Santina Mafalda troka Norberto José lidera CCI Bobonaro

BOBONARO, 24 Fevreiru 2023 (TATOLI)-Kongresista na-in-31 liuhosi konferénsia  datoluk fó konfiansa ba diretora kompañia Marchela Unispesoál Lda, Santina Cadebau Mafalda, lidera Kámara Komérsiu Indústria (CCI, sigla portugés) munisípiu Bobonaro ba períodu 2023-2027 hodi troka prezidente sesante atuál diretór kompañia Hafoun Unip Lda, Norberto José ne’ebé okupa kargu refere durante tinan 12 ona.

Iha konferénsia ne’e kongresista sira propoin kandidatu na’in-tolu komposta hosi Adelino Goncalves nu’udar diretór kompañia Kevkel Unip Lda no Domingos Gouveia Moniz, na’in ba kompañia Hugo Amor Unip Lda Marka, maibé membru asembleia sira eskolla Santina Cadebau Mafalda.

Enkuantu konferénsia ne’e rasik lidera hosi Prezidente Meza, Pedro Lopes, Vise Prezidente, Câncio Perreira no  Sekretária Meza, Anabela do Rego Amarál.

Prezidente CCI munisípiu Bobonaro, Santina Cadebau Mafalda, sente ta’uk no lakohi kandidata-aan atu sai prezidente ba organizasaun setór privadu ne’ebé sai Mahon ba emprezáriu Bobonaro-ona sira.

Maibé tanba hetan apoia másimu hosi la’en kaben no rona motivasaun hosi emprezáriu Bobonaro-oan barak entaun nia deside kompete.

Notísia relevante: Júlio Mak troka Eurico da Rosa lidera CCI-TL Oé-Cusse

“Agradese ba ha’u-nia kaben no kolega sira-ne’ebé suporta ha’u, ba ha’u mesak hamriik labele, tanba ha’u feto ida, maibé ha’u fiar katak ha’u-nia estrutura sira-ne’ebé ohin nomea ona, fiar katak ami bele halo mudansa iha munisípiu Bobonaro ne’e,” nia informa ba jornalista sira, hafoin hetan konfiansa hosi kongresista sira.

Ho konfiansa absoluta ne’e ba futuru, prezidente ho estrutura mós sei konvoka reuniaun ida ho setór privadu sira-ne’ebé kreativu atu halo sensiblizasaun papél no ezisténsia CCI Bobonaro nian bá loja no restaurante sira.

“Ha’u iha estrutura CCI ne’e dezde 2010 kedas, buat barak ne’ebé ami ko’alia kadavez governu mós hateke ami la hetan, tanba laiha lei ida kesi ami-metin, ne’ebé ema barak mak seidauk komprende. Sira hanoin CCI ne’e organizasaun ida atu fahe projetu, maibé loloos la’ós ida-ne’e, entaun ami sei bolu sira mai esplika kle’an ba sira nune’e bele hatene,” Prezidente eleita ne’e fó hanoin ba Governu.

Iha fatin hanesan, Prezidente CCI Sesante, Norberto José, agradese ba konfiansa ne’e atribui ba nia durante tinan 12, maske konsege halo ona buat balu ba emprezáriu sira no balu seidauk konsege rezolve.

“Buat barak ha’u la halo, maibe ho estrutura no lideransa foun ne’ebé ke mai, sei bele book-aan, bele halo buat barak, depois labele sente mesak, importante tenke serbisu hamutuk no konsidera malu nafatin. Ha’u prontu nafatin kontribui hamutuk,” nia katak.

Estrutura CCI Bobonaro ba períodu 2023-2027 lidera hosi prezidente Santina Cadebau Mafalda, ho nia vise iha setór ualu.

Nune’e mós primeiru vise-prezidente ba asuntu formasaun profesionál, turizmu investimentu no relasaun esterna mak hanesan vise primeiru, Adelino Gonfalves no vise-segundu, Marciano Fradinata.

Purtantu, vise-prezidente ba asuntu komérsiu indústria, exportasaun, importasaun no transporte na’in-tolu mak hanesan; Juanino de Jesus Basco, Pedro da Silva dos Reis no Cristian Lay.

Vise-prezidente ba asuntu pequena, médiu empreza no indústria kreativu, Anabela do Rego Amarál, vise-prezidente asuntu agrikultura, pekuária, floresta no akikultura, Pedro da Silva Henriques, vise-prezidente ba asuntu infraestrutura, José Pires no Bendito Marques.

Vise-prezidente ba asuntu dezenvolvimentu zona fronteira, Stefanus Ary, vise-prezidente ba asuntu exportasaun, importasaun transporte, Americo Lay ‘Aqeon’ no vise-prezidente asuntu feto emprezária, Berta da Cruz.

Entrutura hirak-ne’e ho nia fiskál na’in-tolu komposta hosi prezidente António Mendonça, vise Guilhermino Sequeira no sekretáriu na’in-rua.

Estrutura foun ne’ebé lidera CCI munisípiu Bobonaro ne’e simu ona pose iha tuku 17:00, hosi VIII Governu Konstitusionál iha salaun kompañia Rai-Mean Unipesoál Lda, ne’ebé lokaliza suku Raifun, postu administrativu Maliana.

Notísia relevante: Aban, CCI-TL Oé-Cusse realiza konferénsia munisipál

Jornálista: Sérgio da Cruz

Editór: Evaristo Soares Martins