Reabilitasaun sede suku 12 iha Covalima atinje ona 12,8%
COVALIMA, 25 fevereiru 2023 (TATOLI)–Diretór Programa Nasionál Dezenvolvimentu Suku (PNDS), Filipe Cardoso, hateten progresu reabilitasaun sede suku 12 ne’ebé implementa iha postu administrativu Maucatar, Tilomar no Fohorem, munisípiu Covalima, kumulativu progresu fíziku atinje ona 12,8%.
Notísia Relevante: Reabilitasaun sede suku 12 iha Covalima nia progresu atinje ona 6,67%
“Progresu reabilitasaun sede suku faze datoluk iha munisípiu Covalima ne’ebé implementa iha postu administrativu Fohorem, Maucatar no Fohorem ne’e ninia progresu kumulativu atinje ona 12.8%. Ami-nia monitorizasaun sede suku barak sobu ona no traballadór hahú servisu, tanba sede suku balun reabilitasaun totál sobu uma kakuluk no halo mudansa tipu konstrusaun,” Filipe Cardoso hateten ba Agência Tatoli, iha nia kna’ar fatin, Sukaer Laran, Covalima, sesta ne’e.
Progresu reabilitasaun sede suku 12 iha munisípiu atinje 12.8%, tanba progresu kada postu administrativu hanesan postu administrativu Maucatar 28.3%, Fohorem 4% no postu Tilomar 6.37%, fizikamente sede suku kontinua hala’o reabilitasaun.
Reabilitasaun sede suku faze datoluk hamutuk sede suku 12 ne’e, sede suku Matai iha postu administrativu Maucatar, tanba dezastre naturál kondisaun sede suku grave tanba rai nakfera entaun iha momentu ne’e halo sorumutu hodi halo mudansa.
“Ami halo mudansa ba iha dezeñu oinsá garantia fali obra sede suku konklui bele fó resposta urjente ba xefe suku no konsellu suku ho urjente. Maske dezastre ami bele konstrui sentru komunitáriu bazea orsamentu ne’ebé iha,” nia hateten.
Tuir loloos prioritiza sai hanesan reabilitasaun maibé tanba dezastre naturál entaun halo kontrusaun la’ós halo reabilitasaun.
Progresu reabilitasaun sede suku hanesan sede suku iha postu administrativu Fohorem ne’e iha atividade PNDS kontinua kompleta ativdade konstrusaun Uma Naroman ba Povu (UNP) faze dahuluk no daruak no reabilitasaun sede suku haat (4).
“Iha postu administrativu Fohorem hanesan ita hotu hatene perténsia ba área rural, entaun ami indentifika fornesedór ladún iha interrese atu distribui materiál. Bazea ba matadalan ami-nia ekipa utiliza kompra direta ho montante $3000 mai kraik. Ami informa mós fonesedór postu administrativu seluk laiha interrese, ami utiliza jestaun finansa ekipa jestaun suku kompara direta utiliza orsamentu $3000 mai kraik,” nia dehan.
Orsamentu ba rabilitasaun sede suku 12 ne’ebé implementa iha postu administrativu Fohorem,Tilomar no Maucatar ne’e transferidu ona, ho osan hamutuk $144,000.00 no hosi orsamentu ne’e kada sede suku $12,000.00.
Notísia Relevante: Reabilitasaun sede suku haat iha Fohorem sei iha aprovizionamentu
Jornalista : Celestina Teles
Editór : Cancio Ximenes
