Governu dignifika-valoriza veteranu desmobilizadu ho atribuisaun osan $40.000
DILI, 27 fevereiru 2023 (TATOLI)– Prezidente Konsellu Kombatente Libertsaun Nasional (CCLN), Vidal de Jesus “Riak Leman” hateten, veteranu ne’ebé mak kontribui luta ba independénsia ne’e Governu rekonese no dignifika sira hodi atribui osan $40.000 ba ema 117.
Notísia Relevante: Veteranu dezmobilizadu iha Timor-Leste 454
“Governu dignifika no valoriza veteranu desmobilizadu mak ita atribui osan $40.000 ba sira hodi halo konstrui sira-nia uma. Ita fó prioridade mak liohusi ida-ne’e,” Riak Leman hateten ba Agência Tatoli, liuhosi karta eletrónika (e-mail), segunda ne’e.
Prezidente CCLN ne’e hatutan, hosi númeru veteranu ne’e, barak mak lahalo uma tanba sira-nia uma iha hela no iha veteranu hosi munisípiu Manatuto, Laclubar nian labele simu osan tanba laiha família ida mak iha hodi rejistu no hetan direitu ne’e.
“Objetivu konstrusaun uma ba veteranu atu dignifika sira-nia dedikasaun ne’ebé bainhira funu hotu iha tinan 1999, fila mai vila laran laiha fatin hodi hela, tanba ne’e Governu programa hodi konstrui um aba veteran dezmobilizadu sira iha Timor-Leste,” nia dehan.
Sekretáriu Estadu Kombatente Libertasaun Nasionál (SEAKLN), Júlio da Conceição “Meta Mali”, esplika katak iha uma balun ne’ebé seidauk finaliza tanba razaun rai laiha.
“Seidauk finaliza tanba iha razaun oioin katak balun rai laiha, depois iha balun hela área rurál maibé sira lakohi halo uma iha ne’ebá no hakarak halo uma iha vila maibé rai laiha,” Meta Mali hateten.
Entaun, nia hateten, ho buat hirak ne’e hotu prejudika ba halo uma maske Estadu liuhosi Governu transfere ona osan ba kada veteranu nia konta bankária ho montante $40,000.
Notísia Relevante: Governu inaugura ona uma ba veteranu grau 20-24 hamutuk 20-resin
Jornalista : Osória Marques
Editór : Cancio Ximenes
