Tékniku PNDS observa benefisiáriu UNP+ B troka ona zinku feruzen
COVALIMA, 27 fevereiru 2023 (TATOLI)–Diretór Programa Nasionál Dezenvolvimentu Suku (PNDS) Covalima, Filipe Cardoso, hateten tékniku PNDS observa benefisiáriu Uma Naroman ba Povu plus B (UNP+ B) iha postu administrativu Suai, munisípiu Covalima hahú troka ona zinku feruzen.
Notísia Relevante: PNDS sei monitoriza benefisáriu UNP + B iha Suai
“Distribuisaun zinku Uma Naroman ba Povu (UNP) plus B, ami-nia ekipa tékniku munisípiu halo ona akompañamentu benefisiáriu barak sobu no troka ona zinku ne’ebé feruzen. Balun seidauk, ami husu sira-nia justifikasaun ho razaun sira-rasik sei aranja ai entaun ami toma nota,” Filipe Cardoso hateten ba AgÊncia Tatoli, iha nia kna’ar fatin, Sukaer Laran, segunda ne’e.
Maske balun troka ona zinku feruzen ho zinku foun ne’ebé Governu distribui, maibé balun seidauk troka ne’e,tékniku PNDS mós fó tempu ba sira katak fulan-fevereiru nia rohan ne’e, benefisiáriu UNP plus B tenke troka ona zinku no labele rai kle’ur iha uma.
“Ami fó date line ba benefisiáriu sira atu aselera hodi troka zinku. Ami fó durante fulan fevereiru nia laran atu aselera troka zinku feruzen a no zinku ne’ebé sira simu labele rai kle’ur iha sira-nia uma,” nia dehan.
Benefisiáriu UNP plus B implementa iha postu administrativu Suai ho nia benefisiáriu 185 mai hosi suku sira hanesan Camnasa, Debos, Suai Loro, Labarai no Beco.
Entertantu, iha loron 2 fulan-fevreiru tinan 2023, Ministru Administrasaun Estatál Miguel Pereira de Carvalho akompañadu hosi Vise Ministru Administrasaun Estatál (MAE) distribui zinku ba benefisiáriu na’in-185 iha resintu administrasaun munisipiu Covalima.
Hafoin distribuisaun, ekipa PNDS postu administrativu no ekipa jestaun suku halo akompañamentu distribuisaun durante loron rua.
Notísia Relevante: MAE distribui zinku ba benefisiáriu UNP+ B 185 iha Covalima
Jornalista : Celestina Teles
Editór : Cancio Ximenes
