COVALIMA, 02 fevreiru 2023 (TATOLI)–Ministru Administrasaun Estatál (MAE), Miguel Pereira de Carvalho, akompañdua hosi Vise Ministru Administrasaun Estatál ho nia ekipa hamutuk ho administradór munisípiu Covalima distribui zinku ba benefisiáriu Uma Naroman ba Povu (UNP) Plus B hamutuk 185 iha postu administrativu Suai, munisípiu Covalima.
Notísia Relevante: PNDS Covalima sensibiliza UKL+ ba membru konsellu suku Debos
“Ha’u simu konvite hosi administradór munisípiu Covalima ho populasaun sira iha postu administrativu Fohorem atu atende ajenda prinsipál sira hanesan ba dahuluk distribuisaun zinku ba benefisiariu kuaze xefe família 185 ho kada benefisiáriu simu ziku 100, iha postu administrativu Suai, munisípiu Covalima,” Governante ne’e hateten ba jornalista sira, iha resintu AMC, Sukaer Laran, kinta ne’e.
Programa distribuisaun zinku ba benefisiáriu sira-ne’e, VIII Governu Konstituisionál implementa iha tinan kotuk hodi kontinua implementa iha tinan ne’e, atu troka populasaun sira-nia zinku ne’ebé feruzen no kuak ona.
Ho nune’e, liuhuoi sekretariadu PNDS ho xefe suku ho ekipa jestaun suku konsege identifika benefisiáriu hotu.
“Ohin loron, ha’u mai iha ne’e ha’u kontente tebes hodi hasoru diretamente ba benefisiáriu sira hodi espresa sira-nia sentimentu kontente ba programa ferere. Ha’u kontente liu tanba laiha reklamasaun hosi benefisiáriu signifika programa ne’e benefisiáriu ba povu hotu,” nia dehan.
Programa ne’e populasaun sira-ne’e merese duni ho nia kritéria ne’ebé hatuur iha regra ba programa ida-ne’e mak simu.
Aleinde distribui zinku, nia mós sei kontinua hala’o inaugurasaun ba Uma Naroman ba Povu (UNP) iha suku sira iha postu administrativu Fohorem, munisípiu Covalima.
Ho nia prezensa iha Covalima hanesan oportunidade di’ak tebes atu hasoru benefisiáriu tanba tinan kotuk konstrui uma kada suku balun sia (9) to’o 10.
“Ha’u hakarak hasoru komunidade iha Fohorem hodi ko’alia atu bele hatene direta implementasaun hosi programa ida-ne’e, nia benefisiu sira liu-liu komunidade hein bainhira mak bele sai benefisiáriu ba uma hirak ne’e,” nia dehan.
Governante ne’e husu ba benefisiáriu sira hafoin simu zinku ne’e atu sira rasik bele troka zinku sira-ne’e, tanba programa nia objetivu prinsipál mak entrega zinku ba populasaun sira no labele repete erru pasadu hanesan simu tiha kalen hodi faan tutan no seluk tan.
Administradór munisípiu Covalima, Francisco de Andrade, hateten Ministru Administrasaun Estatál Miguel Pereira de Carvalho no Vise Ministru Administrasaun Estatál ho nia ekipa atu hala’o lansamentu hodi distribui zinku ba benefisiáriu sira.
“Ministru Administrasaun Estatál, Miguel Pereira de Carvalho, no Vise Ministru Administrasaun Estatál ho nia ekipa hamutuk ho ita iha Covalima, ida-ne’e ho nia objetivu atu halo distribuisaun programa UKL ka agora UNP Plus B,” nia hateten.
Autoridade Covalima louva VIII Governu Konstituisionál bia programa ne’ebé lidera hosi Primeiru-Ministru, Taur Matan Ruak, ne’ebé hatene povu nia presiza, tanba durante ne’e povu sira sente duni.
Antes ne’e, Diretór PNDS Covalima Filipe Cardoso fó sai dadus katak implementasaun programa Uma Naroman ba Povuplus B ne’ebé implementa iha postu administrativu Suai iha suku lima (5) ho uma unidade-185.
Programa UNP Plus B ne’e, Governu implementa iha postu administrativu Suai, munisípiu Covalima iha suku sira hanesan Camnasa, Suai Loro, Debos, Beco no Labarai.
Jornalista : Celestina Teles
Editór : Cancio Ximenes
