DILI, 28 fevereiru 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Bano, hatete, iha tinan 2022, presta ona deklarasaun iha Komisaun Anti-Korrupsaun (KAK) sobre konstrusaun ró Haksolok.
“Kona-ba atrazu ró Haksolok ha’u presta deklarasaun iha Komisaun Anti-Korrupsaun dala-rua ona. Iha tinan kotuk ha’u ba hato’o informasaun hanesan ho sira seluk ne’ebé KAK bolu ona. Ne’ebé, iha ne’e halo konfuzaun barak, ita lasubar buat ida iha prosesu ró Haksolok nian. Prosesu la’o tarde ka la’e kontratu sira ne’e kompletu”, Prezidente autoridade hateten hafoin relata progresu serbisu ba Xefe Governu, iha Palásiu Governu.
Arsénio Bano dehan dokumentu ne’ebé investigadór husi KAK husu entrega hotu ligadu ho kontratu sira. “Rona dehan eis-ministru balun mós bá ona presta deklarasaun, tenke to’o ida asina kontratu primeiru hanesan eis-Primeiru-Ministru, Xanana Gusmão, [eis-ministru] Pedro Lay, sira mak hahú ha’u-nia misaun atu halo hotu hodi lori ró ne’e mai”, nia dehan.
Prezidente autoridade ne’e planeia ona iha fulan-marsu sei rekruta tripulante besik na’in-20 hodi bá tuir formasaun iha Portugál molok ró Haksolok mai.
“Sira ne’ebé sei serbisu iha estaleiru mak bá uluk tuir formasaun iha Portugál. Ha’u atu hateten katak, iha 28 novembru 2023 ne’e, konstrusaun ró ne’e hotu. Tanba ne’e maka ami prepara tripulante hahú agora. Ró ne’e atu mai, ami hein hela sira hatete lori tempu loron hira ka semana hira”, Arsénio informa.
Notísia relevante: Alkatiri: konstrusaun Ró Haksolok sei konklui iha 2023
Arsénio Bano kontinua promete ba públiku tinan ne’e sei rezolve ró Haksolok no tuir kontratu ne’ebé selebra katak ró ne’e to’o ona mai Timor-Leste iha tinan ne’e tanba konstrusaun hahú kedas iha mandatu Governu Dalimak nian.
Entretantu, orsamentu RAEOA nian iha tinan 2023 hamutuk millaun $120, kompostu hosi millaun $84 ba administrasaun iha rejiaun no millaun $36 prevee iha Fundu Espesiál ba Dezenvolvimentu. Hosi millaun $36 ne’e inklui rihun $32 ne’e fó formasaun ba futuru tripulante ró Haksolok nian.
Notísia relevante: CAC bolu antigu governante Inacio Morreira ba konstrusaun Ró Haksolok
Jornalista: Antónia Gusmão
Editora: Maria Auxiliadora
