DILI, 28 fevereiru 2023 (TATOLI)— Banku Nasionál Komérsiu Timor-Leste (BNCTL, sígla Portugés), tersa ne’e, hahú halo ona pagamentu ka selu indemnizasaun ba komunidade afetadu hosi prosesu konstrusaun estrada munisipál hosi postu administrativu Laga, Baguia no Quelicai, munisípiu Baucau.
Diretór Nasional Urbanizasaun iha Ministériu Obra Públika (MOP), Manuel da Costa Xavier, hateten pagamentu ba indemnizasaun ne’e, direita hosi BNCTL ba komunidade afetadu, no ohin hahú halo pagamentu iha postu administrativu Laga no aban kontinua iha Baguia nafatin iha munisípiu Baucau.
“Ha’u Diretór Nasional Urbanizasaun nian maibé, tanba ha’u hetan orientasaun hosi Ministru atu apoiu aselera reasentamentu no pagamentu ba komunidade afetadu ba projetu estrada Laga, Baguia no Quelicai Ossu. Ho ida ne’e, ha’u akompaña BNCTL halo atividade pagamentu ne’e, no ohin ita hahú halo ona iha postu administrativu Laga no aban kontinua ba Baguia,” Manuel da Costa Xavier dehan ba Agência Tatoli via telefónika, tersa ne’e.
Notisia relevante : PM Taur lansa fatuk dahuluk reabilita estrada Quelicai no Baguia
Nia dehan, tuir oráriu hosi BNCTL pagamentu ba komunidade afetadu ne’e hahú ohin no aban ne’e iha postu administrativu Laga, Baguia no bainhrua kontinua ba Quelicai Ossu. Maibé depende tanba komunidade afetadu ne’e barak.
Ba komunidade afetadu hosi postu administrativu Laga Bagui munisípiu Baucau ne’e rasik hamutuk 450. Hosi sira ne’e mós fó indemnizasaun la hanesan, balu hetan montante kiik no balu hetan montante boot tanba depende ba sira-nia rai no ai-horis sira.
“Ita bele dehan komunidade hosi postu administrativu rua ne’e, hetan pagamentu boot liu $39.000,00 no kiik liu $310,00, maibé orsamentu ba komunidade afetadu 450 hamutuk $677.968,80” Manuel da Costa hateten.
Enkuantu dadus afetadu ba estrada urbana Uaiaka ba Quelicai, Nahareca no Ossu hamutuk uma-kain 381. Hosi afetadu sira ne’e Governu sei halo indemnizasaun hamutuk $448.401,65.
Notisia relevante : Estrada Laga-Baguia kompañia preparadu halo konstrusaun
Antes ne’e, Governu halo lansamentu estrada diresaun rua iha fatin diferente, hanesan estrada reabilitasaun postu Quelicai bá postu Ossu, Nahareka hala’o iha área Uai-aka, suku Abafala no estrada diresaun postu Laga bá Baguia, hala’o iha suku Soba.
Objetivu implementa projeitu ne’e tanba Governu hakarak promove konetividade tuir padraun estrada munisípiu hodi kontribui ba dezenvolvementu sósiu-ekonomiku iha área rurál.
Estrada postu Quelicai rasik ho distánsia kilómetru 22,7 no luan metru 7, komposta hosi aspál metru 4, alargamentu metru 1, ombru metru 2, dreinajen, morru protesaun, sinál tráfegu no kuda ai-oan iha fatin risku.
Enkuantu, estrada diresaun Laga-Baguia purvolta kilómetru 38 ho luan metru 6, responsável hosi empreza Norinco Internasional Corporation, ho kustu projetu millaun $21,7.
Aleinde ne’e, Diresaun Nasionál Estrada, Ponte no Kontrolu Cheia hosi MOP prevee orsamentu iha fundu infraestrutura ba tinan fiskál 2022 hamutuk $16.547.661,76.
Notisia relevante : Governu prevee millaun $22 reabilita estrada Laga-Baguia
Durasaun reabilitasaun estrada ba fulan-18, ne’ebé responsável hosi empreza Chongqing Internasional Construction no supervizaun hosi empreza PY konsep perunding Sdn Bhd hosi Malázia, ho durasaun kontratu fulan-18 no kustu $452.122.
Jornalista : Arminda Fonseca
Editora : Armandina Moniz
