COVALIMA, 01 marsu 2023 (TATOLI)–Ministériu Solidariedade Sosiál no Inkluzasaun (MSSI) liuhosi ofisiál Sentru Solidariedade Sosiál hahú halo ona rejistrasaun ba benefisiáriu bolsa da mãe jerasaun foun iha munisípiu Covalima.
“Ohin ba oin ita-nia ofisiál sira ativu ona iha postu saúde no sentru saúde iha postu administrativu hitu hodi halo rejistu benefisiáriu programa bolsa da mãe jerasaun foun iha munisípiu Covalima,” Diretór Interinu Sentru Solidariedade Sosiál Covalima, Nelson de Jesus, hateten ba Agência Tatoli, iha nia kna’ar fatin, Suai Loro, kuarta ne’e.
Governu nia programa asisténsia sosiál ba inan isin-rua no labarik ho tinan 0-3, kontinua to’o tinan neen (6), no iha mós suplementa adisionál ba labarik sira ho moras króniku ka defisiénsia, ho objetivu atu hamenus ki’ak, hadi’ak saúde no nutrisaun, redus raes-badak no haburas ekonomia ba hotu-hotu
MSSI Implementa programa bolsa da mãe jerasaun foun ne’e servisu hamutuk ho Ministériu Saúde ne’ebé halo diagnostika hodi prosesu sira-nia livru lisio hafoin ofisiál MSSI halo rejistrasaun no Minsitériu justisa liuhusi Servisu rejistu notariadu haree dokumentu kompravativu ne’ebé labarik presiza.
Dadaun ne’e, ofisiál MSSI destaka iha sentru saúde no postu saúde sira no hahú halo ona rejista ba inan isin-rua sira ne’ebé halo konsulta.
Kritéria atu rejistu ba subsídiu inan isin-rua mak hanesan inan-aman kuidadór prinsipál nia kartaun eleitorál, Bileete Identidade (BI), livru Lisio, fixa família konta bankária no númeru telfone ativu.
Iha programa refere, bele rejistu subsídiu ba labarik kartaun eleitorál,Bileti Identidade (BI), livru Liziu, fixa família konta bankária no númeru telfoni ativu sertidaun moris entre loron 90 nia laran.
Pagamentu kada fulan sei hahú hafoin aplikasaun hetan aprovasaun no pagamentu sei tama ba konta bankária no konta karteira eletróniku nomeia ka konta bankária BNCTL ne’ebé kria ba programa.
Subsídsiu inan isin-rua sei kontinua ba bebé bainhira inan partu, se inan hetan abortu pagamentu nafatin kontinua to’o estimasaun loron partu nian, subsídiu ba labarik inklui labarik ho defisiénsia sei para bainhira labarik to’o ona tinan neen (6).
Hafoin ne’e, prosesu pagamentu ba inan isin-rua fulan-fulan $15.00, labarik tinan 0-3 kontinua tinan to’o tinan neen (6) $20.00 no labarik ho moras króniku ka ho difisiénsia plus $10.00.
Subsídiu ne’e uza ba hodi tulun família ba nesesidade loro-loron nian, ai-han, transporte, ai-han moruk hodi promove inan no labarik nia saúde no nutrisaun liuhosi sosa no han hahan ne’ebé saudavel.konsulta ante-natál (ANC) dala-ualu (8) no pós-natál (PNC) dala haat (4).
Entertantu, Governu liuhosi Ministériu Solidariedade Sosial no Inkluzaun (MSSI) implementa programa bolsa da mãe jerasaun foun bazea ba dekretu-lei númeru 22/2021.
Jornalista : Celestina Teles
Editór : Cancio Ximenes
