DILI, 01 marsu 2023 (TATOLI) – Prezidente Repúblika (PR), José Ramos Horta, promulga ona Dekretu-Lei n.u 2/2023, 15 fevereiru ne’ebé aprova subsídiu alimentasaun ba traballadór sira ne’ebé ezerse funsaun iha Postu Integradu Fronteira (PIF) no Alfándega.
Dekretu-lei foun ne’ebé aprezenta husi Ministru Finansa, Rui Gomes, ne’e promulga iha 07 fevereiru no públika ona iha Jornal da República iha 15 fulan refere.
Ministru Finansa, Rui Gomes, hatete katak razaun husi diploma ne’e tanba traballadór sira bainhira ezerse nia funsaun iha PIF tenke dezloka permanente husi sira-nian domisíliu. Aleinde ne’e, PIF no Alfândegas iha períodu funsionamentu espesiál ne’ebé adapta nesesidade espesífika ne’ebé obriga traballadór sira ezerse sira-nia funsaun hodi hala’o servisu ba períodu tempu ne’ebé naruk no realiza sira-nia refeisaun sai hosi oras baibain.
“Ho razaun ne’e mak Governu konsidera nesesáriu atu kompensa traballadór hirak ne’e ba sira-nia kondisaun serbisu espesiál liuhusi atribuisaun subsídiu alimentasaun”, ministru afirma liuhosi nota ne’ebé Agência Tatoli asesu, kuarta ne’e.
Subsídiu alimentasaun ne’e ho montante $7 ba kada loron traballu efetivu no sei selu mensalmente hamutuk ho traballadór sira-nia remunerasaun liuhusi transferénsia bankária. Montante subsídiu alimentasaun kalkula bazeia ba loron traballu efetivu husi traballadór-sira aneksa ho lista prezensa ne’ebé mak aprovadu husi superiór sira.
Diploma foun ne’e hahú vigora iha loron tuirmai husi loron publikasaun no produz efeitu husi loron 01 fulan-setembru 2022.
Notísia relevante: Governu aprova subsídiu alimentasaun ba traballadór ezerse funsaun iha pontu integradu
Jornalista: Antónia Gusmão
Editora: Maria Auxiliadora
