DILI, 02 marsu 2023 (TATOLI) – Ekipa ho naran estimadu Académica FC hosi Universidade Nasionál Timor-Lorosa’e (UNTL) susesu iha nia jornada da-ruak hodi halo terus nia adversáriu Aitana FC ho golu tolu ka 3-0 iha jogu kontinuasaun Liga Futebol Timor-Leste (LFTL).
Jogu ba ekipa rua hala’o iha Estádiu Munisipál Dili kinta loraik ne’e, iha ne’ebé dirije hosi árbitru Francisco Pereira, juiz liña Antonio de Carvalho, Paulo da Costa no árbitru rezerva Candido Carvalho.
Hosi vitória académica nian ne’e hamonu kedan Aitana hosi tabela klasifikasaun provizóriu lina primeiru ba segundu tanba hetan de’it pontu tolu enkuantu Académica semo ba tur kedan iha númeru primeiru ho pontu haat.
Hanesan baibain jogu hahú bainhira árbitru hú arbitu ekipa rua ne’ebé simu orientasaun másimu hosi treinadór sira hodi lansa kontra no atake ba malu tuir tékniku no abilidade ekipa ida-idak nian atu buka hatama golu.
Jogu ba ekipa rua ne’e la’o ho másimu tebes tanba iha ámbitu furak basa anima hosi adeptu Académica no Aitana ne’ebé tur hadulas iha tribun leten Estádiu nian hakilar haklalak hodi fó suporta ne’ebé másimu halo jogadór sira iha vontade ne’ebé makas hodi hala’o jogu iha kampu leten be nahe ho dut matak mamar ne’e.
Jogu durante menutu 45 forsa entre ekipa rua nunka diferente ho nune’e ekipa Académica no Aitana obrigadu tenke empata 0-0.
Hakur ba segunda parte ekipa rua nafatin halo jogu ne’ebé másimu liután, treinadór Académica ho ran nakali halo mudansa ba jogu liuliu liña klaran atu bele suplay bola ba avansadu sira bele halo netik golu ruma.
Mudansa estratejia ne’e la hela de’it hanesan mudansa tanba iha menutu 70 jogadór Juvinal Boavida (19) lansa ona primeira golu bainhira avansadu Nortey Kojo (18) lansa sutu ida ba rede Aitana guarda rede Celestino da Costa (30) konsege baku sai no Juvinal simu kedan ho sutu kalma bola tama liu ba rede Aitana hatur kedan rezultadu ba 1-0.
Hosi golu ne’e hasae liután reasaun adeptu Académica sira nian ne’ebé maioria estudante UNTL hakilar ho lian makas halo adeptu Aitana sira tur tane hasan hodi hare ho lian laek.
Ho suporta másimu ne’ebé estudante UNTL sira halo ne’e fó duni rezultadu ba ekipa tanba jogadór sira joga ho esperansa nune’e iha menutu 73 jogadór Helder Lopes (17) halo jogu individu hodi fintas defeza Aitana nian kuaze na’in tolu nia pasa bola ho kalma ba jogadór Hilario Ximenes (11) fura kedan rede Aitana muda rezultadu ba 2-0.
Hosi golu ne’e halo jogadór Aitana sira nia esperansa lakon kedan maske nafatin hala’o jogu maibé la hanesan ona primeira parte ne’ebé solidu no másimu tebes.
Maske nune’e avansadu Aitana Mamoudou Conde esforsu makas atu halo netik golu ruma maibé defeza Académica tenta hamate tutuir nia jogu, nune’e esforsu hotu Aitana nian hela de’it ho naran tanba nunka prodúz golu ruma.
Menutu la’o to’o 79 sorte di’ak monu tan ba Académica liuhosi jogadór Helder lansa tan golu ida muda rezultadu ba 3-0 halo falla kedan Aitana nia jogu too menutu 90 termina vitória hela ba Académica.
Eskuad Académica:
Otilio Guterres (30), Erolismo Martins (4), Calistro Pereira (22), Lexy Junior Atok (26), Joel Gaio (6), Alexandre da Cruz (10), Juvinal Boavida (19), Hilario Ximenes (11), Dani Ardianto (2), Damianus Putra (12), Nortey Kojo (18).
Suplente:
Jemecriz Pereira (1), Leandro Amaral (16), Filipe Ling (5), Helmerino da Costa (8), Florindo Soares (21), Jose Freitas (23), Helder Lopes (17), Antonio Ximenes (13), Ary Cristovão (3), Jesualdo da Costa (27) no Melchior Cristovão (14).
Treinadór: Luzinho Saco
Eskuad Aitana:
Celcio da Costa (30), Dnilo Alves (2), Roberto Maia (28), Pascoal Ximenes (17), Francelino Belo (22), Rigeberd Lay (7), Osvaldo Freitas (24), Gabriel da Costa (14), Luis da Silva (8), Jilson dos Reis (10) no Mamoudou Conde (27).
Suplente:
Emiliano Pereira (5), Rivaldo Martins (13), Herminio Moniz (31), Natalino Morais (16), Miguel Araujo (9), Alexandre Nogueira (6), Helder Valente (46), Wiliam Vong (21), Benjamin Amaral (25) no Rivaldo Correira (77).
Treinadór: José Fonseca
Jornalista: Hortencio Sanchez
Editór : Zezito Silva
