“Tara” triste Xanana Gusmão la partisipa iha komemorasaun loron nasionál veteranu
DILI, 03 marsu 2023 (TATOLI)—Veteranu hosi munisípiu Ainaro, Augusto “Tara” Araújo, sente triste tanba líder nasionál ka Maun Boot Kay Rala Anana Gusmão la partisipa iha komemorasaun loron nasionál veteranu ba dala-VI (03 marsu 2017-03 marsu 2023) iha Palásiu Governu, sesta (03 marsu 2023) ne’e.
Notísia Relevante: Riak Leman husu “Maun Boot” sira hamutuk lori dezenvolvimentu ba povu
“Ha’u hanesan ema-ne’ebé tuir Maun Boot sira, ita fiar ba sira, tanba sira mak ohin loron ita hetan ukun an, ita nia independénsia, livre hosi buat hotu-hotu. Maibé Maun Boot sira balun ninia prezensa laiha, halo ami mós triste boot. Maibé ita kontinua la’o nafatin, mezmu Maun Boot sira la mai, ita hotu reprezenta ona,” Veteranu Tara hateten ba Agência Tatoli, hafoin partisipa loron nasionál veteran iha Dili.
Entretantu, veteranu hosi munisípiu Ainaro ho grau 15-19, Silvino Alves “Lamahana”, husu ba “Maun Boot” (lider nasionál) sira atu haketak polítika no unidade nasionál nune’e hamutuk hodi servi nasaun no povu ida-ne’e ba dezenvolvimentu.
“Ha’u hakarak husu ba Maun Boot sira atu hamriik no la’o hamutuk. Polítika ne’e buat seluk ida, maibé hanesan veteranu tenke hamutuk atu iha forsa lori veteranu sira-ne’e ba liberdade no hamutuk hodi dezenvolve ita-nia rain no povu ne’ebé futuru ne’ebé prósperu,” Lamahan hateten.
Ho nune’e, nia dehan, kontinua dignifika no valoriza veteranu no veterana sira inklui povu ba moris di’ak, liu-liu ekomenda ba Governu tenke tau matan ba veteranu sira-ne’ebé to’o ohin loron sei iha mukit nia laran ne’e.
Veterana hosi munisípiu Liquiça, Ana Lúcia dos Santos, “Namalai”, husu Governu atu hadi’a povu nia moris tanba povu barak mak sei moris iha ki’ak nia laran.
“Ami-nia hakarak boot sira tenke hamutuk, hodi haree nasaun ne’e ba oin. Hanesan horisehik, horibainrua ami haree ami mós laran moras. Tanba ne’e, hanesan feto ne’ebé durante ne’e kontribui ba libertasaun ida-ne’e husu atu lolo-liman ba malu hodi unidade, pás no estabilidade ba rai ida-ne’e,” Namalai dehan.
Veterana hosi munisípiu Ainaro, Gracinda Rosa de Almeida, “Birosa”, sente triste tanba sei iha inan-feton barak hanesan mós mane, uluk iha ai-laran luta ba libertasaun nasionál hodi fakar raan maibé to’o ohin loron sira moris iha terus nia laran.
“Ba loron ida ohin ne’e, loron veteranu sira-nian, maibé antes ita atu realiza ita-nia loron ida ohin ne’e prosesu naruk. Bainhira ukun an tiha, maibé loron ohin ne’e sente triste tanba ami-nia feto maluk barak hanesan mós mane sira barak fakar ran to’o ohin loron maibé sei terus hela. Maibé ohin loron realiza duni buat ne’ebé ita hotu nia mehi, la’ós ami veteranu sira maibé ita hotu tantu feto ka mane, ita hotu nia mehi to’o ohin loron ita realiza duni eventu ida-ne’e,” nia hateten.
To’o ohin loron, veteran sira bele hatutan erói no eroina sira ne’ebé fakar raan no soe sira-nia isin ba rai ida-ne’e, la soe saugate mak ohin loron Timor-Leste nasaun ida-ne’ebé hamriik, nasaun ida-ne’ebé soberania independénsia.
“Ha’u hakarak rekomenda liu-liu Estadu no Governu tinan lima-lima troka maibé se Governu foun ida mak mai tenke kontinua dignifika veteranu sira no labele haluha loron ida veteranu no labele haluha ita-nia erói no eróina sira-ne’ebé fakar raan, soe isin durante 24 ba rai ida-ne’e,” nia hateten.
Jornalista : Osória Marques
Editór : Cancio Ximenes
