PN bele halo rezolusaun ba PN Indonézia buka Nicolau Lobato nia ruin
DILI, 07 marsu 2023 (TATOLI)—Deputadu hosi hosi bankada Congresso Nacional de Reconstrução Timorense (CNRT) iha Parlamentu Nasionál (PN), Leandro Lobato, hateten PN bele hasai rezolusaun ida hato’o ba PN Indonézia hodi trata kestaun buka tuir saudozu Nicolau Lobato ni restu mortal ho erói sira seluk nian ne’ebé to’o agora seidauk hetan.
Notísia Relevante: Horta ko’alia ona ho Indonézia identifika saudozu Nicolau Lobato nia ruin
“Ita-nia grupu amizade parlamentár Timor-Leste ho Indonézia iha vizita ba Indonézia momentu iha meadu fulan-agostu (2022) iha grupu amizade parlamentár Indonézia nian liuhosi komunikasaun, ha’u ho Deputada balun ami halo komunikasaun, sira hateten liga ho restu mortál ba ita-nia saudozu sira ne’e Parlamentu Nasionál Timor-Leste ka grupu amizade PN Timor-Leste bele halo rezolusaun ruma, pois ita hato’o ba sira,” Deputadu Leando Lobato hato’o liu-hosi reuniaun plenária PN, tersa ne’e.
Ho nune’e, nia dehan, sira mós bele hato’o perante sira-nia plenária hodi mós impoin ba Governu, ne’e hanesan mekanizmu ida.
“Tanba maun Mandati sempre foti no to’o oras ne’e Governu rasik mós la fó resposta, ne’e hanesan mekanizmu ida bele halo tentativa hodi konsidera ita-nia hanoin sira,” nia hateten.
Deputadu Partidu Demokrátiku (PD), Mariano Assanami Sabino, hateten nia-parte fó apoiu ba Deputadu David Dias Ximenes ‘Mandati’ ne’ebé levanta bebeik iha PN kona-ba kestaun buka tuir saudozu Nicolau Lobato ho restu mortál erói sira seluk nian ruin ne’ebé to’o agora seidauk hetan.
“Hanoin tenke klareza ba ita hotu, tanba dalabarak ita ba Indonézia ko’alia bebeik no PN rasik reprezenta ba iha ne’eba ko’alia kona-ba ita-nia erói funu-na’in sira liu-liu prezidente Nicolau Lobato ho komandante Daitula ho sira seluk, ne’ebé ita sempre levanta beibeik, maibé mínimu tenke iha seriedade mai esplika iha Parlamentu ne’e ninia prosesu ne’e to’o iha ne’ebé,” nia dehan.
Tuir Assanmi, daudaun sira eis militár (Indonézia) timoroan barak ba iha ne’eba hasoru hanesan komandante Lere ba sira hasoru malu, no uluk Xanana ba mós hanesan, sira komandante lubun ida ba uluk sira tiru malu agora sira amigu, ne’e mak aproveita agora buka tuir to’ok prosesu ne’e la’o nusa.
Prezidente PN, Aniceto Longuinhos Guterres Lopes, hateten kona-ba restu mortál nia-parte sei lembra bainhira vizita ba iha grupu parlamentár hosi TL ba Indonézia.
“Ha’u sei lembra, loos duni, iha vizita ba Jakarta grupu amizade hosi parte rua PN no DPRI ko’alia asuntu ne’e, soké to’o agora ita seidauk follow up ida-ne’e rezolusaun Parlamentu atu hasai,” nia hateten.
Nia hanoin grupu amizade Parlamentu Timor-Leste bele hola inisiativa prepara projetu rezolusaun ruma, tanba ita akompaña iha Indonézia mós sira komesa forma ona komisaun lia-loos rekonsiliasaun ba sira atu halo investigasaun komesa hosi tinan 1965, sira-nia komesa hanoin entaun Timor-Leste mós presiza aproveita hodi hola parte.
“Hosi ita-nia PN hasai rezolusaun fó instrui Governu no mós uza rezolusaun ne’e ko’alia entre grupu amizade parlamentár rai rua nian hodi prosesa, nune’e meza hein proposta rezolusaun ruma hosi grupu amizade Parlamentár TL nian kona-ba ida-ne’e uza halo kontaktu,” nia hateten.
Notísia Relevante: Membru PN husu Governu ezije Indonézia buka Nicolau Lobato nia ruin
Jornalista : Nelson de Sousa
Editór : Cancio Ximenes
