Horta ko’alia ona ho Indonézia identifika saudozu Nicolau Lobato nia ruin
DILI, 28 fevereiru 2023 (TATOLI)–Prezidente Repúblika, José Ramos Horta, hateten halo ona diplomásia ho nasaun viziñu Indonézia atu identifika Saudozu Nicalau Lobatu nia ruin maibé seidauk iha solusaun.
“Dezde ha’u sai Prezidente ha’u halo diplomásia ho seriedade ho amigu Indonézia para identifika Prezidente Nicolau Lobato nia ruin. To’o agora la’o nafatin hela no seidauk iha solusaun maibé ha’u sei la husik ida-ne’e,” PR Horta hateten ba jornalista sira, bainhira partisipa iha simpóziu nasionál “Hametin Demokrásia, Pás, no Estabilidade iha konstrusaun Estadu”, iha salaun Laline Larigutu, Colmera, tersa ne’e.
Entretantu, Prezidente Konsellu Kombatente Nasionál (CCLN), Vidal de Jesus “Riak Leman”, hateten atu buka tuir saudozu sira hanesan Nicolau Lobato, Mauhudo no Komandante Daitula nia ruin ne’e presiza Governu Timor-Leste ho jenerál Indonézia nian.
“Ami atu ba buka Mauhudu nia ruin iha ne’ebé, anaunsér liuhosi Governu hanesan Maun Boot Xanana, Maun Boot Lú Olo, Maun Boot Taur Matan Ruak mak ba-mai Indonézia hodi hasoru malu ho jenerál iha ne’ebá. Maibé, ami hotu preokupa saudozu sira-nia ruin iha ne’ebé hanesan Komandante Daitula nian mós Saudozu Nicolau Lobato rai iha ne’ebé,” Riak Leman dehan.
Ho asuntu ne’e, Riak Leman haktuir katak momentu sei tempu Sekretáriu Estadu Kombatente Libertasaun Nasionál (CCLN) sesante nian katak buka la hetan planu halo de’it hodi tau ka hakerek sira-nia naran iha fatuk ida nune’e ema bele ba vizita.
“Ha’u hanoin ida-ne’e di’ak nune’e família sira ba vizita de’it ona tanba ita buka iha ai-laran maibé la hetan ona no ida-ne’e mak dalan ida,” nia dehan.
Liga ho loron nasionál veteranu nian, Deputadu sira iha Parlamentu Nasionál husu Governu atu koordena ho Governu Indonézia hodi buka tuir restu mortál erói sira nian hanesan Nicolau Lobato ho sira seluk hodi bele haloot iha fatin dignu.
Notísia Relevante: Membru PN husu Governu ezije Indonézia buka Nicolau Lobato nia ruin
Jornalista : Osória Marques
Editór : Cancio Ximenes
