DILI, 08 marsu 2023 (TATOLI) – Primeiru-Ministru (PM), Taur Matan Ruak, no Ministru Prezidénsia Konsellu Ministru, Fidélis Magalhães, halo aprezentasaun, iha reuniaun Konsellu Minstru, kona-ba preparasaun relatóriu mandatu Governu Daualuk no elaborasaun edisaun daruak kona-ba relatóriu Revizaun Nasionál Voluntária (VNR 2.0, sigla inglés) kona-ba progresu iha implementasaun ba Objetivu Dezenvolvimentu Sustentavel (ODS).
Fidélis Magalhães haktuir durante aprezentasaun analiza ona konteúdu, estrutura, kronograma no metodolojia ba elaborasaun ba relatóriu hirak ne’e.
“Retratu mandatu Governu Daualuk [2018-2023] nu’udar publikasaun ida ne’ebé sei dezkreve atividade prinsipál sira no rezultadu husi Governu ne’e nian hahú kedas husi simu posse, nune’e mós dezafiu hirak ne’ebé enfrenta ona no rekomendasaun ba futuru. Hirak ne’e sei temi avansu sira iha setór sosiál, institusionál, ekonómiku no infraestrutura nian”, Fidélis hatete iha Palásiu Governu, kuarta ne’e.
Notísia relevante: Ezekutivu kria komisaun ba elaborasaun relatóriu finál Governu Daualuk nian
Revizaun Nasionál Voluntária ne’e nu’udar prosesu ne’ebé país sira avalia no aprezenta progresu nasionál ne’ebé hetan ona iha implementasaun ajenda tinan 2030 nian, ne’ebé inklui avansu 17 iha ODS, ho objetivu atu halo progresu lalais liuhusi partilla esperiénsia sira, aprendizajen entre pár sira, identifikasaun lakuna no prátika di’ak no mobilizasaun parseria.
Relatóriu VNR sei prepara ho rekursu konsulta alargada ida no sei haree ba rezultadu avaliasaun foun husi Estadu ba implementasaun Planu Estratéjiku Nasionál (PED) 2011-2030 nian, ne’ebé konklui ona iha tinan 2021, atu avalia situasaun daudaun ne’e nian no permite atu atualiza rezultadu ne’ebé reporta husi Timor-Leste iha 2019.
“Rezultadu hirak ne’e sei aprezenta, iha fulan-jullu tinan 2023, ba Fórum Polítiku Altu Nivel Nasaun Unidade nian kona-ba Dezenvolvimentu Sustentavel, iha Nova Iorke, hafoin hetan tiha aprovasaun husi Konsellu Ministru”, konklui.
Notísia relevante: Governu lansa relatóriu VNR ‘Ema nu’udar sentru ba dezenvolvimentu’
Jornalista: Antónia Gusmão
Editora: Maria Auxiliadora
