iklan

EKONOMIA, HEADLINE

Tinan ne’e, SERVE,I.P kontinua fali programa rejistu móvel iha munisípiu hotu

Tinan ne’e, SERVE,I.P kontinua fali programa rejistu móvel iha munisípiu hotu

Diretór Ezekutivu SERVE, I.P, Florêncio da Costa Sanches. Imajen Tatoli/Francisco Sony

DILI, 14 marsu 2023 (TATOLI)—Diretór Ezekutivu Servisu Rejistu no Verifikasaun Emprezariál, Institutu Públiku (SERVE,I.P), Florêncio da Costa Sanches, hateten tinan ne’e sira-nia parte sei kontinua filafali programa rejistu movel iha munisípiu hotu.

“Programa rejistu móvel ita lansa iha tinan kotuk no hala’o ona iha tinan kotuk konsege rejistu ona empreza lubuk ida. Iha fali  tinan ne’e, hahú  iha  agostu ita sei kontinua filafali programa rejistu movel ne’e ba iha munisípiu hotu,” Florêncio da Costa Sanches dehan ba Agência Tatoli, iha nia knaar-fatin, Hudi-Laran, Dili, tersa ne’e.

Nia dehan, sira-nia parte hili to’o fulan agostu mak kontinua tanba sira halo rejistu movel ne’e to’o ba área rurál sira. Ho ida ne’e,  presiza tempu bailoron nune’e ekipa bele halo viajen to’o baze.

“Tinan ne’e, ita atu hala’o fali programa refere, nune’e husu ba Ministériu Justisa (MJ), atu ajuda prepara kartaun Billete Identidade (BI). Tanba iha tinan kotuk, ita halo rejistu movél ne’e iha empreza barak mak mai atu rejistu maibé laiha kartaun BI. Sira mai ho razaun atu trata BI iha munisípiu dehan kartaun hotu. Tanba ne’e,  MJ tenke ajuda  hodi fasilita atu sira mos bele rejistu iha SERVE,I.P,” nia dehan.

Notisia relevante :Programa rejistu móvel SERVE,I.P fulan tolu konsege rejista empresa 39.000-resin 

Programa rejistu móvel ne’e rasik lansa iha loron 21 agostu 2022 no to’o dezembru 2022 SERVE,I.P konsege alista empreza 5.000 resin.

“Rejistu móvel ne’e iha benefísiu hanesan fó reseita ba Estadu liuhosi rejista no benefísiu ba emprezáriu sira, bainhira rejistu tiha bele hetan sertifikadu no bele asesu ba garantia kréditu ne’ebé Governu prevee millaun $50, seguransa sosiál, no bele kompete iha programa Cesta Bázika,” nia hateten.

SERVE,I.P ho inisiativa hala’o atividade ne’e tanba komunidade maioria hela iha área rurál no bainhira atu mai vila la’o kilómetru 20 to’o 45, entaun Servisu Rejistrasaun mak tun hodi fasilita komunidade.

“Bainhira negosiante hala’o atividade negósiu maibé la rejista maka bele hetan multa tanba viola dekretu-lei SERVE, I.P ne’ebé deteta halo verifikasaun ba atividade fíziku no arkivu elektróniku, entidade sira viola lei númeru 10/2017 kona-ba sosiedade komunikasaun, no dekretu-lei númeru 16/2017 kona-ba rejistu komersiál nomos dekretu-lei 34/2017 kona-ba  lisensiamentu atividade ekonómika,” nia tenik.

Notisia relevante : Programa rejistrasaun movél, SERVE alista empreza 52 iha Bobonaro

Jornalista : Arminda Fonseca

Editora    : Armandina Moniz

 

 

iklan
iklan

Leave a Reply

iklan
error: Content is protected !!