DILI, 20 outubru 2022 (TATOLI) — Diretór Ezekutivu Servisu Rejistu no Verifikasaun Emprezariál, Institutu Públiku (SERVE,I.P), Florêncio Sanches, hateten programa rejistu movél ne’ebé lansa iha 21 agostu to’o outubru, tinan ne’e, konsege rejista ona empreza hamutuk 39.000 resin.
“Programa rejistu móvel ne’ebé ita lansa iha fulan agostu nia-laran ba munisípiu hotu la inklui, Ataúro, to’o agora konsege alista ona empreza hamutuk 39.000-resin, tuir planu rejistu movel sei ramata iha fulan oin”, Florêncio Sanches, ba Agência Tatoli, iha nia knaar-fatin, Hudi-Laran, kinta ne’e.
Dietór revela SERVE, I.P ho inisiativa hala’o atividade ne’e tanba komunidade maioria hela iha área rurál no bainhira atu mai vila la’o kilómetru 20 to’o 45, entaun servisu rejistrasaun mak tun hodi fasilita komunidade.
“Objetivu SERVE,I.P hala’o programa ne’e tanba bainhira negosiante hala’o atividade negósiu maibé la rejista maka bele hetan multa tanba viola dekretu-lei SERVE, I.P ne’ebé deteta halo verifikasaun ba atividade fíziku no arkivu elektróniku, entidade sira viola lei númeru 10/2017 kona-ba sosiedade komunikasaun, dekretu-lei númeru 16/2017 kona-ba rejistu komersiál no dekretu-lei 34/2017 kona-ba lisensiamentu atividade ekonómika”, Florêncio hateten.
Serbisu móvel ne’e, hetan apresiasaun másima tebes hosi setór privadu sira tanba envolve mós Asosiasaun Feto Emprezariál Timor-Leste (ATMTL).
“Kona-ba reseita hosi programa móvel ne’e rasik, ne’e mak ita seidauk sura maibé ba fulan tolu nian agostu to’o outubru, ita bele hetan $5.000 liu”, konklui.
Jornalista : Arminda Fonseca
Editór : Zezito Silva
