DILI, 16 marsu 2023 (TATOLI)-Parlamentu Nasionál (PN), tuir orariu iha loron 20 fulan-marsu 2023 sei halo apresiasaun foun ba alterasaun lei eleitorál ne’ebé maka Prezidente Repúblika, José Ramos Horta, veto ona foinlalais.
“Ohin, reuniaun lidér bankada diskute asuntu ida ne’e, ita sei iha nova apresiasaun ba iha veto ba lei Eleitorál ba Parlamentu Nasionál númeru 6/2006, ne’ebé hetan revizaun ba iha lei númeru 78/V(5a), iha segunda-feira,” Sekretária Meza PN, Deputada Lídia Norberta, informa ba jornalista sira hafoin reuniaun lidér bankada iha sala konferénsia PN, kinta ne’e.
Notísia Relevante :Xefe Estadu veta lei eleitorál tanba votasaun paralela
Durante reuniaun lidér bankada ne’ebé lidera hosi Prezidente Parlamentu Nasionál, Aniceto Longuinhos Guterres Lopes, fó mós nia mensajen kona-ba veto lei eleitoral hosi Xefe Estadu ho razaun fundamenta maka estabelesimentu sentru votasaun paralelu.
“Ami sei la ko’alia veto paralelu, tuir Prezidente (Repúblika) ninia persepsaun dehan katak ladun loos, ida ne’e ami sei la ko’alia tanba iha segunda-feira bainhira iha reuniaun iha plenária mak ita sei rona pontu de vista hosi Deputadu sira hotu,” Nia dehan.
Sekretária Meza PN, dehan iha apresiasaun ne’e atu haree fila-fali kona-ba votu postál ho matriz braille ne’ebé Prezidente Repúblika konsidera hanesan kestaun urjente tebes atu haree.
“Hau atu esplika ba ita bo’ot sira, bainhira Prezidente uza nia kompeténsia tuir artigu 81, númeru 1 iha konstituisaun repúblika nian, entaun iha ne’e mak Parlamentu Nasionál ka’er ba ida ne’e tuir kompeténsia PN nian ne’ebé hatur iha rejimentu PN iha artigu 115 iha ne’eba ita tama ona ba prosesu ida hanaran prosesu de nova apresiasaun, bainhira iha apresiasaun iha ne’e ita haree katak dentru loron 90 Deputadu sira tenke halo ona apresiasaun foun hahú kedas hosi loron ne’ebé mak Prezidente Repúblika veta hahú hosi 14 marsu,” nia dehan.
Iha apresiasaun foun ne’e, tuir rejimentu PN iha artigu 116, ezije atu tenke iha prezensa hosi dois terço deputadu sira, no hosi dois terço deputadu ne’e kuandu prezente ona, hodi halo apresiasaun ho votu a-favór 33 nune’e bele haruka fila-fali ba Prezidente Repúblika atu promulga.
Notísia Relevante :Desizaun veto, MAE: hein votu konfirmasaun husi PN
Jornalista: Nelson de Sousa
Editór: Agapito dos Santos
