IQTL,I.P husu públiku provizóriu labele konsumu mina Symphoni

DILI, 17 marsu 2023 (TATOLI)—Prezidente Institutu Kualidade Timor-Leste (IQTL, sigla portugés), Rosito de Sousa Monteiro, husu públiku  provizóriu labele konsumu mina han ho naran Symphoni tanba deskonfia mina refere kontamina buat balu la di’ak ba ema-nia saúde.

“Husu públiku provizóriu labele konsumu lai mina ho naran Symphoni ne’e. Tanba mina refere deskonfia ladi’ak ba ema-nia saúde, no daudaun ne’e mós Ministériu Saúde foti ona amostra ba mina refere halo teste iha sira-nia laboratóriu  no iha tempu badak sei fó sai ninia rezultadu ne’ebé ita hotu hein,” Rosito de Sousa Monteiro dehan ba Agência Tatoli, iha nia knaar-fatin, Timor Plaza, Dili, sesta ne’e.

Nia dehan, públiku provizóriu labele konsumu lai mina Symphoni ne’e rasik tanba tuir informasaun hosi parseiru Indonézia BPOM (Badan Pengawas Obat dan Makanan) ka Ajénsia Nasional Kontrola Ai-moruk no Ai-han iha Indonézia hato’o katak mina refere prodús iha Indonézia maibé loloos seidauk bele halo sirkulasaun interna iha merkadu Indonézia inklui ba nasaun sira seluk tanba seidauk halo asesmen ba iha prosesamentu indústria mina ne’e rasik.

Notisia relevante : AIFAESA,I.P husu loja sira provizóriu labele faan mina Symphoni

“Nune’e ita sei hein rezultadu teste amostra ba mina ne’e hosi MS mak ekipa halo fali intervensaun ba empreza sira ne’ebé mak hatama produtu ne’e mai,” nia dehan.

Nia dehan, daudaun ne’e, Ministériu Saúde mak halo teste ba produtu refere, tanba IQTL,I.P rasik hotuhotu hatene tinan ne’e mak foin prevee orsamentu atu sosa mákina teste tolu.

Nia dehan, IQTL,I.P hanesan Autoridade Estadu nian ne’ebé servisu ba área atu garante kualidade produtu importasaun no exportasaun nian. Tinan ne’e IQTL,I.P iha planu atu sosa ekipamentu ka teste produtu kualidade item tolu mak koko mina, kafé no bee.

“Ho problema sira ne’e, IQTL mós tinan ne’e, sei sosa ekipamentu tolu. Ida ne’e ita sei koko ba produtu tolu, tantu ba importasaun no exportasaun nian hanesan, bee, mina no kafé. Importante mak tenke produtu tolu ne’e, no nia prosesu agora ba konkursu públiku nian, ho nia montante orsamentu hamutuk $105.000,” Rosito hateten.

Nia afirma, ekipa daudaun ne’e servisu hamutuk foti amostra ba mina Symphoni mak IQTL,I.P servisu hamutuk, ho Autoridade Inspesaun no Fiskalizasaun Atividade Ekonómika, Sanitária no Alimentár, Institutu Públiku (AIFAESA,I.P), Ministériu Saúde (MS), Ministériu Turizmu Komérsiu no Indústria (MTKI) liuhosi Diresaun Nasional Regulasaun Komersiál (DNRC, sigla portugés). 

Jornalista : Arminda Fonseca

Editora    : Armandina Moniz