iklan

DILI, HEADLINE, POLÍTIKA

Deputada Olinda husu Governu kontrola mina sona Symphoni

Deputada Olinda husu Governu kontrola mina sona Symphoni

Mina Symphoni. Imajen espesial

DILI, 20 marsu 2023 (TATOLI)-Deputada Olinda Guterres, hosi Bankada KHUNTO iha uma fukun Parlamentu Nasionál (PN), husu ba Governu atu kontrola sirkulasaun mina sona ho naran Symphoni iha merkadu iha territóriu nasionál.

“Mina Shymponi agora virál mina lanu, hau-nia ema sira hola kle’ur ona, horse’ik no horibainrua rona dehan lanu fali, hanoin husu Governu presiza kontrola,”  Deputada Olinda, hato’o preokupasaun ne’e liu hosi reuniaun plenária PN, segunda ne’e.

Notísia Relevante :AIFAESA,I.P husu loja sira provizóriu labele faan mina Symphoni

Nia dehan, mina sona ne’e deskonfia lanu ema tanba daudaun ne’e virál loos iha media sosiál tanba ne’e, Governu liu hosi Autoridade Inspeksaun no Fiskalizasaun Ekonómia no Sanitária (AIFAESA) presiza halo inspesaun rutina liután iha merkadu.

Antes ne’e, Diretór Nasionál Saúde Públika iha Ministéiru Saúde, Frederico Bosco, fó sai katak sidadaun na’in tolu daudaun rekupera ona liuhosi tratamentu iha sentru saúde Formoza hafoin deskonfia konsúmu mina sona ho marka Symphoni.

Entertantu, Inspetór Jerál, Autoridade Inspesaun no Fiskalizasaun Atividade Ekonómika, Sanitária no Alimentár, Institutu Públiku (AIFAESA,I.P), Ernesto Monteiro, husu loja na’in sira provizóriu labele faan mina han ho naran Symphoni tanba deskonfia mina refere la di’ak ba ema-nia saúde.

“Ha’u husu ba públiku liuliu loja na’in sira provizóriu hapara faan mina han ne’ebé ho naran symphoni, tanba deskonfia mina refere la di’ak ba ema-nia saúde,” Ernesto Monteiro dehan ba Agência Tatoli, iha Embaixada Repúblika Indonezia (KBRI).

Nia afirma, tuir informasaun ne’ebé nia rona mina Symphoni ne’e rasik, importa hosi Indonézia, maibé empreza ne’ebé mak hatama AIFAESA,I.P la hatene tanba daudaun ne’e, merkadu livre ema hotu bele halo karta lisensa hatama sasán hodi faan.

Notísia Relevante :AIFAESA,I.P ho OMS realiza formasaun kontrolu ba risku ai-han iha Timor-Leste

Jornalista: Nelson de Sousa

Editór: Agapito dos Santos

iklan
iklan

Leave a Reply

iklan
error: Content is protected !!