Bobonaro hetan alokasaun rihun $600 implementa PMOPA

BOBONARO, 21 marsu 2023 (TATOLI) – Autoridade munisípiu Bobonaro hetan alokasaun orsamentu hosi Ministériu Administrasaun Estatál (MAE) hamutuk rihun $600 hodi implementa Programa Mão de Obra Postu Administrativu (PMOPA) tinan 2023 nian.

Notísia relevante: MAE aloka millaun $6.3 ba PMOPA

“Ita iha programa Mão de Obra Postu AAdministrativu ne’e ba munisípiu Bobonaro iha tinan 2023, ita iha kolokasaun orsamrntu hamutuk rihun $600. Hosi orsamentu ne’e, kada postu administrativu neen ne’e sei koloka rihun $100,” Sekretáriu Autoridade Munisípiu Bobonaro, João de Fátima do Carmo, informa ba Agência Tatoli, iha Maliana, tersa ne’e.

Adjuntu Prezidente Autoridade Munisípiu ne’e esplika, hosi montante oramentu ne’e sei finansia atividade 282 no kada postu hetan atividade 47, ne’ebé sei enkarrega ema na’in-5,586 nune’e kada postu ema na’in-931 no aldeia ema na’in-20.

Nia fundamenta, atividade 282 ne’ebé mak traballadór sira sei halo maka hanesan reparasaun ba estrada, manutensaun estrada kiik sira iha área rurál no urbana, área inundasaun, re-floresta ai-horis hodi proteje rai halai no halo limpeza hodi hamoos lixu no dreinajen.

“Husu ba komunidade hotu, liuliu juventude sira, ita-nia alin sira-ne’ebé mak iha vontade atu aplika iha programa ida-ne’e, primeiru maka tenke iha vontade, tanba ne’e oramentu jerál estadu, saida mak ita bele halo fó kontribuisaun ba ita-nia munisípiu to’o suku sira no ba iha área sira-ne’ebé mak ita bele perkore ba,” nia katak.

João do Carmo dehan, tuir planu programa ne’e sei implementa iha inísiu fulan-abríl tinan ne’e, hafoin tama ba tempu bai-loron atu fó biban ba traballadór sira halo serbisu ho másimu.

“Ha’u husu ba administradór postu sira atu ezekuta orsamentu ne’e tuir duni matadalan programa ne’e no baze legál sira atu bele fó susesu ba programa ne’e, tanba ne’e orsamentu estadu ne’ebé fó benefísiu ba ita-nia povu,” nia katak.

Notísia relevante: MAE husu administradór postu implementa didi’ak PMOPA 2023

Jornalista   : Sergio da Cruz

Editór          : Evaristo Soares Martins