DILI, 21 marsu 2023 (TATOLI)-Governu liuhosi Ministériu Defeza, Filomeno Paixão de Jesus, akompaña hosi Xefe Estadu Maiór Jenerál F-FDTL, Tenente Jenerál, Falur Rate La’ek ho ekipa tersa ne’e, aprezenta planu estratéjiku militár ba Prezidente Repúblika, José Ramos Horta.
“Ohin, Prezidente bolu ami ho Jenerál mai kontinuasaun uluk halo brifieng ba Prezidente, dahuluk, kona-ba lei programasaun militár, daruak, kona-ba dekretu lei aprovizionamentu espesiál ba defeza no F-FDTL,” Governante ne’e hateten ba jornalista sira hafoin ramata enkontru ho Xefe Estadu iha Palásiu Prezidensiál, Bairru-Pité Dili.
Notísia Relevante :PN aprova proposta-lei Programasaun Militár iha finál globál
Nia dehan bainhira atu hetan lei programasaun militár ida, governu halo tiha estratéjia foun ida ba F-FDTL, komesa hosi konseitu estratéjiku militár foun, ko’alia kona-ba misaun forsa nian no sistema forsa ho dispózitu ho ninia planu ba tinan 10.
“Ohin ami ko’alia liliu iha tinan lima mai oin,”nia hatutan.
Tuir Ministru Defeza ne’e katak Prezidente Repúblika konkorda ho planu ne’ebé maka Governu prodúz ona, maibé Xefe Estadu sei konsulta planu estratéjiku ne’e ho líder nasionál sira antes promulga lei ne’ebé maka antes ne’e Parlamentu Nasionál aprova ona iha finál globál.
Kona-ba lei aprovizionamentu nian, Nia dehan, Xefe Estadu promete atu halo promulgasaun bainhira Governu submeter ona ba ninia gabinete Prezidensia Repúblika.
Filomeno Paixão relata Parlamentu Nasionál iha semana kotuk liubá aprova ona proposta lei númeru 49/V (5a)-Lei Programasaun Militár iha finál globál ho votu a-favór 45, kontra no abstensaun 0.
Antes ne’e, Ministru Defeza (MF), Filomeno Paixão de Jesus, hateten proposta lei programasaun militár ho enkuadramentu ba orsamentu despeza públika relativa ho ekipamentu armamentu, ho ninia impaktu direitu ba identifikasaun kapasidade militár ne’ebé nesesáriu hodi sustenta forsa nasionál no kumpre misaun iha F-FDTL.
“Proposta lei programasaun militár torna prinsipál referensiadu finanseiru ba orientasaun levantamentu kapasidade médiu no longu prazu kona-ba diretiva polítika estruturante ho objetivu moderniza, operasionaliza sistema forsa nasionál,” Nia hateten.
Planu estratéjiku dezenvolvimentu 2011-2030 ne’ebé afirma meta to’o 2030, FALINTIL-FDTL iha kapasidade hodi responde efikásia multiplu kompromisu militár.
Tuir nia programa Governu daualu ho aprovasaun konseitu estratéjiku defeza no seguransa nasionál, defeza no simentár, edifísiu, estruturante planeamentu estratéjiku hodi konsolida diretiva ministeriadu planeamentu defeza militár.
No konseitu estratéjiku militár misaun F-FDTL dispózitu forsa próriu ho proposta lei programasaun militár ho dalan modernizasaun ba profesionalizasaun F-FDTL.
“Ho sentidu ne’e, lei programasaun militár fundamentál la’ós de’it ba dezenvolvimentu F-FDTL hanesan forsa konvensionál, morderna, maibé ba mós futuru ba ita-nia nasaun hanesan Estadu direitu demokrátiku, soberanu no indepedente ba kontribui internasional pás no seguru,” Nia dehan.
Enkuantu, proposta lei ne’e iha artigu hamutuk 22, hahú hosi expozisaun motivu, kapítulu I dispozisaun jerál ho nia artigu haat, Kapítulu II kona-ba prosesu programasaun ho artigu ualu, kapítulu III koana-ba ezekusaun lei programasaun militár ho artigu lima, kapítulu IV kona-ba revizaun ho artigu rua, kapítulu V kona-ba dispozisaun komplementár no finál ho artigu tolu.
Notísia Relevante :PN aprova proposta-lei Programasaun Militár iha faze jeneralidade
Jornalista: Nelson de Sousa
Editór: Agapito dos Santos