iklan

DILI, ELEISAUN, HEADLINE, POLÍTIKA

PN sei  fó fila-fali alterasaun lei eleitorál ba PR

PN sei  fó fila-fali alterasaun lei eleitorál ba PR

Prezidente Parlamentu Nasionál, Aniceto Longuinhos Guterres Lopes. Imajen Tatoli/Francisco Sony

DILI, 22 marsu 2023 (TATOLI)-Prezidente Parlamentu Nasionál, Aniceto Longuinhos Guterres, informa meza PN iha tempu badak sei fó fila-fali dekretu númeru 78/V PN, alterasaun dalima lei númeru 6/2006, 28 dezembru kona-ba alterasaun lei eleitorál ba Prezidente Repúblika (PR), José Ramos Horta, hodi promulga durante prazu loron ualu nia laran tanba deputadu sira fó ona votu konfirmasaun foin lalais ne’e.

“Seida’uk no depois ami sei envia ba,” Aniceto Longuinhos Guterres  informa ba jornalista sira iha PN, kuarta ne’e.

Notísia relevante:PN fó ona votu konfirmasaun ba alterasaun lei eleitorál hodi haruka fila-fali ba PR

Iha parte seluk, Aniceto preokupa ho prazu promulgasaun hosi Xefe Estadu nian tanba antes ne’e haruka ona alterasaun lei eleitorál purvolta loron 20 atu promulga maibé ikusmai deside hodi veto .

“Maibé ami haruka ba kle’ur tiha parese liu tiha fulan ida mak nia promulga, ida ne’e de’it mós nia viola tiha ona, agora liu tiha loron 20 nia mai dehan veto,’’Aniceto preokupa.

Nia hateten bainhira Prezidente Repúblika maka tarde atu promulga alterasaun lei eleitorál ne’e, maka Governu sei mantein uza lei ejistente hodi realiza eleisaun parlamentár. Maibé alterasaun lei eleitorál ne’e Governu pretende hodi introdús medida foun sira ho objetivu maka hasa’e taxa partisipasaun iha eleisaun parlamentár iha loron 21 fulan-maiu 2023.

Iha loron 20 fulan marsu ne’e PN liu hosi reuniaun plenária fó ona votu konfirmasaun ho rezultadu votu a-favór 37, kontra 21 no abstensaun rua ba dekretu númeru 78/V PN-alterasaun dalima lei númeru 6/2006, 28 dezembru lei eleitorál ba PN ne’ebé antes ne’e hetan veto hosi Prezidente Repúblika José Ramos Horta.

Notísia relevante: Xefe Estadu veta lei eleitorál tanba votasaun paralela

Jornalista: Nelson de Sousa

Editór: Agapito dos Santos        

iklan
iklan

Leave a Reply

iklan
error: Content is protected !!