DILI, 23 marsu 2023 (TATOLI)-Prezidente Parlamentu Nasionál (PPN), Aniceto Longuinhos Guterres Lopes, hateten, tuir ajenda kinta lokraik ne’e, sei bolu deputadu hamutuk na’in-16 hosi Partidu CNRT hodi hato’o sira-nia defeza relasiona ho karta notifikasaun ne’ebé maka meza parlamentu nasionál hasai tersa ne’e.
Razaun hosi meza Parlamentu Nasionál (PN) hasai notifikasaun ne’e tanba deputadu na’in-16 ne’e la marka prezensa ka auzénsia durante plenária dala neen bainhira meja ajenda data eleisaun atu hili Komisáriu foun Komisaun Anti Korrupsaun (CAC,sigle portugués).
Notísia Relevante :PN notifika Deputadu CNRT na’in-16 ameasa lakon mandatu
“Deputadu ida-idak ne’ebé simu karta ne’e, sira iha direitu tomak atu ko’alia, tanba ne’e orsida iha audénsia lokra’ik sira bele hato’o sira-nia defeza, justifikasaun,” Prezidente PN ne’e informa ba jornalista sira iha uma fukun Parlamentu Nasionál hafoin reuniaun lidér bankada Parlamentár, kinta ne’e.
Tan ne’e, Nia dehan, karta notifikasaun ne’e hanesan prosesu inísial no seidauk iha desizaun ruma tanba deputadu no deputada na’in-16 ne’e seidauk hato’o defeza ba meza Parlamentu konaba-ba karta notifikasaun ne’e rasik.
Aniceto hatutan bainhira sira hato’o ona defeza ba meza PN, no meza Parlamentu mak sei deside, iha desizaun maka deklara deputadu na’in 16 lakon duni sira-nia mandatu nu’udar reprezentante povu ka lae?.
Maibé deputadu sira sei iha tempu durante semana rua hodi hatama sira-nia rekursu ba plenária no iha plenária maka deside atu simu ka rejeita, se rejeita entaun bele rekore rekursu ne’e ba Tribunál.
Aniceto Guterres, dehan nia-parte atua tuir rejimentu no lei ne’ebé iha rekezitu saida mak ko’alia kona-ba lakon mandatu.
“Tanba Deputadu mai atu hala’o nia kna’ar hanesan deputadu tuir lei no rejimentu, tanba Estadu kada fulan selu, agora nia serbisu mai iha Parlamentu Nasionál tenke atende plenária, komisaun, no ko’alia,” Nia hateten.
Tuir Aniceto rejimentu Parlamentu nian prevista katak se loron lima sesaun plenária dala lima tuituir malu mak deputadu ida la partisipa plenáriu no laiha justifikasaun ruma, no justifikasaun tenke baseia ba lei la’ós justifikasaun tuir polítika tanba ne’e ameasa bele lakon mandatu hanesan deputadu.
Enkuantu, tuir rejimentu PN iha artigu 7.º (Lakon mandatu), iha alínea 1 hateten, deputadu sei lakon mandatu bainhira: a) la ho justifikasaun, la hola asentu iha Parlamentu Nasionál to’o sesaun plenária ba dala lima ka la mosu dala lima tuituir malu ba sesaun plenáriu nian ka sesaun komisaun nian, no mós bainhira nia falta dala 15, maske la tuituir malu, la ho motivu justifikadu.
Notísia Relevante :PPN sei baixa projeitu lei altera korum hili komisáriu KAK
Jornalista: Nelson de Sousa
Editór: Agapito dos Santos
