iklan

NASIONÁL, JUSTISA, DILI, HEADLINE, POLÍTIKA

PPN sei baixa projeitu lei altera korum hili komisáriu KAK

PPN sei baixa projeitu lei altera korum hili komisáriu KAK

Prezidente Parlamentu Nasionál, Aniceto Longuinhos Guterres Lopes. Imajen Tatoli/Antonio Daciparu

DILI, 22 marsu 2023 (TATOLI)-Prezidente Parlamentu Nasionál, Aniceto Longuinhos Guterres, informa nia-parte sei baixa inisiativa kona-ba projeitu lei ida hodi altera tiha korum hodi hili Komisáriu ba Komisaun Anti-Korrupsaun (CAC,sigla portugués).

“Projeitu lei iha tiha ona inisiativa atu altera lei kona-ba korum funsionamentu, parese ohin ha’u baixa ba komisaun A  trata asuntu Justisa no Konstituisionál hodi halo apresiasaun,” Nia hateten ba jornalista sira iha PN, kuarta ne’e.

Notísia Relevante :https://tatoli.tl/2023/02/13/pn-adia-eleisaun-ba-komisariu-cac-tanba-la-prenxe-korum/

Projeitu lei ho objetivu maka atu halo altersaun ba korum hodi hili komisáriu foun ba KAK, tanba iha lei atuál presiza mínimu deputadu prezente ema na’in 49 , agora iha inisiativa foun atu halo revizaun ne’e ho maiória absoluta de’it bele hala’o ona eleisaun, la presiza tan to’o deputadu 49.

“Se lae órgaun Estadu sira la funsiona tanba bankada balun impede korum, ne’e mak akontese, kuandu ajenda ba hili komisáriu sira lakoi marka prezensa loron tomak,”Nia hateten.

Aniceto, hatutan alterasaun ne’e laiha korum espesífiku, maibé se  maiória absoluta tenke iha deliberasaun deputadu mínimu ema na’in-33, tanba lei ida atuál tenke iha deputadu prezente-49, agora atu sai hosi situasaun ne’e tenke altera nune’e hili komisáriu eleitu  ho de’it maiória absoluta.

“Bele iha maiória deputadu prezente halo ona eleisaun ba komisáriu KAK,”nia hateten.

Tuir planu iha semana oin bele diskute ona projeitu lei ne’e iha plenária hodi aprova alterasaun no bainhira Prezidente Repúblika promulga mak meza sei hahú hikas diskusaun hodi hili komisáriu KAK tuir lei foun ne’ebé PR promulga.

“Prezidente Repúblika mak hatene se nia sente ida ne’e ba interese Estadu nian tenke la’o, promulga, se la promulga ita Estadu tomak asume komisáriu mandatu laiha ona nia laiha podér atu halo investigasaun efetivu, tanba ninia lejitimidade legalidade iha kestaun,”Nia hateten

Iha fatin hanesan, Deputada hosi bankada CNRT, Carmelita Caetano Moniz, hateten tanba sa mak tau deputadu prezente 49 iha korum hodi hili eleisaun komisáriu KAK, tanba ita tenke hili ema ne’ebé iha lejitimidade polítika forte no kredibilidade.

“Hodi asume kargu nakonu ho imparsialidade, indepedénsia haree kazu korrupsaun hanesan krime sistemátiku la’ós fasil, tan ne’e presiza konsesu iha forsa polítika ida ne’ebé bo’ot. La’ós maiória manán buat hotu, se hanesan ne’e uluk ami halo maiória absoluta de’it tanba lei aprova iha CNRT nia ukun, maibé ami lakoi tanba atu sai komisáriu KAK ida tenke iha ema ida lejitimidade forte hosi reprezentante povu,” nia hateten.

Notísia Relevante :PN notifika Deputadu CNRT na’in-16 ameasa lakon mandatu

Jornalista: Nelson de Sousa

Editór: Agapito dos Santos

iklan
iklan

Leave a Reply

iklan
error: Content is protected !!