iklan

BOBONARO, HEADLINE, MUNISÍPIU, SAÚDE

Postu saúde sira iha Bobonaro menus rekursu umanu no ekipamentu médiku

Postu saúde sira iha Bobonaro menus rekursu umanu no ekipamentu médiku

Diretór Servisu Saúde Munisípiu Bobonaro, João Barreto Cardoso. Imajen Tatoli/Sérgio da Cruz.

MALIANA, 28 marsu 2023 (TATOLI – Postu saúde sira iha munisípiu Bobonaro, menus rekursu umanu no ekipamentu médiku.

Diretór Servisu Saúde Munisípiu Bobonaro, João Barreto Cardoso, fó-sai katak, durante ne’e sentru saúde komunitária, liuliu postu saúde ne’ebé estabelese iha suku sira enfrenta hela problema menus rekursu umanu no ekipamentu médiku atu halo atendimentu ba komunidade, liuliu ba sira-ne’ebé hela iha liu área remota.

Notísia relevante: Ai-moruk item balun iha saúde Bobonaro stoke out dezde 2022

“Agora daudaun ita-nia rekursu umanu limitadu, liuliu parteira, ita-nia postu saúde lubun ida mak iha de’it enfermeiru no laiha parteira, iha postu saúde balun mós laiha médiku tanba agora daudaun ne’e ita iha médiku 36 de’it, ké ita-nia fasilidade lubuk ida tiha ona, maibé ita-nia médiku sei menus,” nia informa ba jornalista sira, Holsa, Maliana, segunda ne’e.

Nia dehan, problema ne’ebé akontese iha postu saúde tolu iha Lolotoe, postu ida de’it mak iha médiku, rua seluk laiha até agora.

Nune’e mós iha Cailaco iha postu saúde Genulai laiha médiku no Goulolo mós enfermeiru ida de’it mak halo servisu hodi atende komunidade sira.

Enkuantu iha sentru saúde komunitária Balibó, postu saúde Sanirin laiha médiku, Leo-Lima parteira no médiku laiha hotu, só iha enfermeiru ida de’it mak halo serbisu, maske postu saúde refere estabelese tinan barak ona.

“Ita taka kondisaun sira-ne’e ho klínika movél, ekipa médiku sira hosi sentru saúde Balibo mak tenke halo oráriu vizita halo tratamentu apoiu enfermeiru ne’ebé koloka mesak hela iha postu saúde Leo-Hitu,” nia katak.

Diretór ne’e subliña, daudaun ne’e médiku ne’ebé destaka iha fasilidade sira hamutuk 36, komposta hosi permanente na’in-34 no internatu na’in-rua. Enkuantu emfermeiru iha na’in na’in 80 resin kompostu hosi Permanenti 53 no internatu 30-resin. Enkuantu parteira na’in-50 komposta hosi permanente 31 no internatu 17.

“Maibé ita-nia parteira sira-ne’e barak liu mak koloka iha sentru saúde ho razaun tanba volume servisu boot liu kompara ho postu saúde, entaun ita koloka na’in-tolu bele troka malu. Ho ida-ne’e mak postu saúde balu parteira sei mamuk,” nia akresenta.

Maske parteira hirak-ne’e kolokadu iha sentru saúde hitu ne’ebé estabelese iha munisípiu Bobonaro, maibé sei nafatin hasoru difikuldade oituan, tanba iha loron-sábadu no domingu tenke ferias.

“Sira-ne’e tanba ema la’o rai hotu, sira presiza vizita família, dalaruma balun feen iha fatin seluk, la’en iha fatin seluk, sábadu no domingu tenke fila ba uma,” nia salienta.

Ligadu ho problema hirak-ne’e, Governu liuhosi programa rejime internatu, tenta atu prienxe fasilidade saúde sira hotu ho mínimu ema nai’in-tolu komposta hosi médiku ida, parteira no enfermeiru.

Nia dehan, Ministériu Saúde loke vaga, ema barak mak lakohi aplika ba fatin sira-ne’ebé konsidera área rurál liu.

“Liuliu médiku sira, loke vaga kuaze tinan tolu ka tinan haat tuituir malu, Bobonaro hetan de’it na’in-rua rejime internatu, tanba kolega sira-ne’ebé akaba iha medisina sira prefere liu ba servisu iha ajénsia internasionál no ONG sira, tanba kompara governu fó subsídiu ka uang saku ne’ebé kiik liu, atu sustenta sira-nia moris,” nia katak.

Enkuantu totál sentru saúde iha munisípiu Bobonaro hamutuk hitu no postu saúde ne’ebé operasionaliza hela hamutuk 28 no aumenta tán postu saúde foun rua iha Cailaco, ne’ebé to’o agora seidauk koloka pesoál saúde.

Notísia relevante: Saúde Bobonaro prepara ambulánsia rezerva rua atende CHC hitu

Jornálista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!