DILI, 29 marsu 2023 (TATOLI) – Governu kria Autoridade Turizmu Timor-Leste, Institutu Públiku, liuhusi projetu dekretu-lei ne’ebé aprezenta hosi Ministériu Turizmu, Komérsiu no Indústria (MTKI), José Lucas do Carmo da Silva.
“Autoridade Turizmu ne’e ne’e sei responsavel ba matéria ne’ebé relasiona ho regulasaun, promosaun no marketing, valorizasaun ambiente negósiu no sustentabilidade turizmu nian”, Ministru Koordenadór Asuntu Ekonómiku, Joaquim Amaral, dehan iha Palásiu Governu, kuarta ne’e. N
Nia esplika autoridade ne’e sei iha kompeténsia regulatória iha matéria turístika ne’ebé dezenvolve husi entidade públika no privada sira.
Nune’e, Autoridade Turizmu ne’e tutela husi membru Governu ne’ebé responsavel iha área turizmu nian no sei iha misaun atu promove, kapasita, koordena, akompaña no dezenvolve setór privadu no públiku, hodi kontribui ba promosaun no fortalesimentu turizmu nian ba dezenvolvimentu ekonómiku iha país ne’e.
“Sei responsavel mós atu kualifika no dezenvolve infraestrutura turístika, dezenvolve kualifikasaun no formasaun rekursu umanu nian, apoia ba investimentu iha setór turístiku, promove kriasaun koñesimentu kona-ba setór ne’e no koordena promosaun interna no esterna Timor-Leste nian nu’udar destinu turístiku”, nia konklui.
Notísia relevante: Ministru Turizmu aprezenta opsaun polítika-lejizlativa rua iha Konsellu Ministru
Jornalista: Antónia Gusmão
Editora: Maria Auxiliadora
