DILI, 31 marsu 2023 (TATOLI)-Prezidente Komisaun B trata asuntu Negósiu Estranjeiru, Defeza no Seguransa iha Parlamentu Nasionál, José Agostinho Sequeira ‘Somotxo’, husu ba Governu atu aumenta númeru PNTL no Falintil-FDTL iha liña Fronteira hodi asegura seguransa iha eleisaun parlamentár.
“Ita hakarak ko’alia kona-ba estabilidade kampañia ho eleisaun, konserteza ita tenke garantia situasaun iha ita-nia fronteira, tanba ita-nia maluk timoroan sira barak iha ne’ebá, sira mós iha direitu atu mai partisipa ba festa demokrásia, maibé odamatan legál, labele mai hanesan ilegál, depois bele kria instabilidade iha ne’ebá kampañia depois halai fali ba sorin,” Nia hateten ba jornalista sira iha uma fukun Parlamentu Nasionál, sesta ne’e.
Notísia Relevante :UPF koordena ona ho TNI asegura liña fronteira iha eleisaun lejizlativa
Iha kinta ne’e, nia relata Parlamentu Nasionál liuhosi Komisaun B halo ona audénsia ho Ministériu Interiór no Ministériu Defeza inklui Xefe Casa Sívil Prezidensia Repúblika hodi diskute asuntu ne’e liliu liga ho orsamentu, ekipamentu operasionál no rekursu umanu no seluk tan hodi konkretiza rekomendasaun ne’e.
“Asuntu ne’ebé ko’alia liga ba operasionál, saida mak operasionaliza ita-nia forsa rua primeiru mak orsamentu, transporte ho efetivu sira ne’ebé ita-nia polísia ho militár ninian ita sei reforsa iha ne’ebá, ne’e reforsa iha ne’ebeá la’ós atu ko’alia ba ita bo’ot sira maibé militár ho polísia hatene fatin sira ne’ebé mak hanesan risku ba kampaña sira,” Deputadu Somotxo dehan.
Komisaun B, antes ne’e halo ona vizita bá fronteira Motain Munisípiu Bobonaro, Mota-Masin Covalima no RAEOA hodi halo audénsia ho instituisaun tutela iha fronteira nune’e bele kria kondisaun ba PNTL no Falintil Forsa Defeza Timor-Leste bainhira destaka iha liña fronteira hodi asegura seguransa iha eleisaun parlamentár.
Tuir Deputadu hosi Partidu Fretilin ne’e ninia observasaun iha fronteira nota atividade komérsiu ilegál daudaun ne’e buras hafoin Governu hasa’e impostu ba produtu asukarada sira iha tinan 2023.
“Iha liña fronteira atividade komesa hatama sasán ilegál ne’e númeru aumenta kompara ho tinan kotuk hanesan sigarru, mina rai, nune’e aproveita hato’o ba Governu atu haree medida seguransa iha fronteira atu evita atividade ho dalan ilegál,”nia hateten.
Notísia Relevante :Presiza aumenta postu vijilánsia no membru UPF kontrola fronteira
Jornalista: Nelson de Sousa
Editór: Agapito dos Santos
