DILI, 03 abríl 2023 (TATOLI) – Primeiru-Ministru, Taur Matan Ruak, kestiona atrazu ba konstrusaun Unidade Pediatra no Kuidadu Koronáriu Intensivu (UCCI, sigla portugés) iha Ospitál Nasionál Guido Valadares (HNGV, sigla portugés) ne’ebé halo tiha ona lansamentu fatuk dahuluk, maibé seidauk iha progresu fíziku iha terrenu, dehan Vise-Primeiru-Ministru Asuntu ba Infraestrutura, José Maria dos Reis.
“Primeiru-Ministru foti kestaun ida iha reuniaun Konsellu Ministru semana kotuk kona-ba edifísiu Unidade Pediatra HNGV ne’ebé halo tiha lansamentu, maibé atraza. Más, empreza sira iha períodu ida ne’e tenta atu hadi’a”, José Reis hatete hafoin relata progresu serbisu ba Xefe Ezekutivu, iha Palásiu Governu, segunda ne’e.
Nia hatutan empreza konstrutora sei halo uluk sira-nia edifísiu besik área konstrusaun, depois mak hahú obra ho harii muru.
Konstrusaun Unidade Pediatra ho andar lima no UCCI iha HNGV ne’e ho totál orsamentu hamutuk milaun $9,3 ba duransaun tinan-rua.
Obra ba Unidade Pediatra ne’e ezekuta hosi empreza China Civil Engineer Contruction Corporation (CCECC) ne’ebé hili hosi Komisaun Nasionál Aprovisionamentu (CNA, sigla portugés), liuhosi prosesu konkursu públiku.
Lansamentu fatuk ba konstrusaun Unidade Pediátria no UCCI ne’e hosi Primeiru Ministru, Taur Matan Ruak, iha loron 26 janeiru tinan ne’e.
Notísia relevante: https://tatoli.tl/2023/01/27/konstrusaun-pediatria-no-iccu-aloka-milaun-9-3-ba-durasaun-tinan-rua/
Jornalista: Antónia Gusmão
Editora: Maria Auxiliadora
