STAE Bobonaro selesiona hela konkorrente ofisiál eleitorál 2,899
MALIANA, 11 abríl 2023 (TATOLI) – Sekretariadu Tékniku Administrasaun Eleitorál (STAE) Munisípiu Bobonaro, selesiona hela konkorrente ofisiál eleitorál eleisaun parlamentár 21 maiu 2023 hamutuk na’in-2,899 ne’ebé submete dokumentu kada postu to’o iha loron 31 fulan-marsu.
Diretór STAE Munisípiu Bobonaro, Mariano Viegas Amarál, subliña, konkorrente hirak-ne’e mai hosi postu administrativu Atabae na’in-291, Balibo 333, Cailaco 310, Bobonaro 752, Loloto’e 326 no barak liu hosi postu administrativu Maliana ho totál na’in-887.
Notísia relevante: STAE Bobonaro hahú rekruta ofisiál eleitorál 1.700
“Agora daudaun ne’e iha hela prosesu selesaun dokumentu hela, loron ikus liu remata selesaun dokumentu iha 21 abríl, ita taka rezultadu tuir orientasaun hosi diresaun jerál nia loron 25 abril,” nia informa ba jornalista sira, iha kna’ar-fatin, tersa ne’e.
Nia dehan, hosi númeru ne’e STAE presiza ofisiál eleitorál na’in-1,700 hodi koloka kada estasaun votu 170 ne’e ema na’in-10.
Maibé antes ezekuta sira-nia papél no funsaun ofisiál eleitorál ne’ebé selesionadu sei tuir formasaun kona-bá regra no lei eleitorál, hafoin iha loron 20 fulan-maiu ne’e sira bele simu materiál sensitivu ho naun-sensitivu nune’e iha loron 21 fulan-maiu sira ezekuta serbisu iha sentru votasaun idak-idak.
“Ha’u husu ba konkorrente sira, karik STAE eskolla ita sai manán-na’in ba ofisiál eleitorál, hanesan sidadaun husu ita partisipa másimu iha prosesu formasaun sira, nune’e bainhira implementa atividade eleisaun nian iha sentru votasaun atubele implementa ho di’ak, labele iha dúvida, implementa tuir lei no regulamentu ho prosedimentu,” Diretór Mariano apela.
Relembra fali katak antes ne’e STAE mós rekruta ona brigadista hamutuk na’in-170 ne’ebé daudaun ne’e hala’o ona sira-nia serbisu iha baze.
Notísia relevante: STAE Bobonaro fó teste eskrita ba kandidatu brigadista 356
Jornalista : Sergio da Cruz
Editór : Evaristo Soares Martins
