iklan

OPINIAUN

Satisfasaun audiénsia uza Tatoli,I.P hodi kombate lixu (Estudu kazu suku Mascarinhas baze ba Teoria Uses and Gratifications)

Satisfasaun audiénsia uza Tatoli,I.P hodi kombate lixu (Estudu kazu suku Mascarinhas baze ba Teoria Uses and Gratifications)

Autór: Augusta Neusa Moniz (1), Adelina de Jesus (2), Carolina Pereira (3), Carlos de Jesus (4), Estefania A. de Jesus Soares (5). Miguel Gonçalves Dosente Integrál DCS-FCS-UNTL (Revizór teórika)

Introdusaun
Lixu mak inimigu ba ambiente limpu no moris saudável ema nian iha planeta ne’e. Lixu mós dada esforsu no atensaun globál nian hodi luta ba kombate lixu, liuhusi objetivu dezenvolvimentu sustentável (ODS) dasanulu-resin-tolu (13o) kona-ba Asaun Klimátika. Iha indikadór ida-ne’e hatuur katak “foti medida sira-ne’ebé urjente atu kombate mudansa klimátika no nia impaktu sira”. Nune’e, papél mídia importante loos atu hatutan esforsu hirak ne’ebé atinje ona. Iha artigu ne’e konsentra ba mídia Tatoli,I.P asumi liu papél oinsá promove, konsolida, eduka audiénsia sira atu promove asaun hodi kombate lixu.

Audiénsia mós iha kapasidade atu utiliza valór informasaun di’ak ne’ebé fó sai.
Ohin loron, ema sempre hala’o atividade, tuir saida mak sira hakarak utiliza ho sira-nia satisfasaun ba saida mak sira utilizu. Realmente timoroan sira utiliza mídia tuir sira-nia hakarak hodi responde sira-nia nesesidade informativa. Nune’e, mídia ne’ebé audiénsia utiliza obrigadu fó sai informasaun ne’ebé kompletu no influénsia bele kompriende asuntu ne’ebé mídia públika, tanba audiénsia hili mídia atu kompleta nesesidade informativa.

Mídia hanesan kanál komunikasaun ho nia papél maka atu hato’o, arkivu no fahe informasaun. Mídia mós sai hanesan fatin sentru ida ba informasaun ne’ebé reprezenta faktu sira. Tuir Morissan, At All (2013) katak mídia nu’udar organizasaun ida ho nia konteúdu mensajen ne’ebé preparadu, importante hanesan ponte relasaun ida iha prosesu mídiasaun ba sosiedade ne’ebé sira utiliza hodi halo debate no halo mudansa ba sira-nia aan.

Bazeia ba definisaun mídia hanesan naroman no fó ligasaun ba komunidade liuhusi prosesu buka no fahe informasaun ne’ebé foin akontese no akontese tiha ona. Iha parte seluk mídia mós sai hanesan dalan ka matéria ida atu fahe mensajen ka informasaun husi komunikadór ba audiénsia sira rezultadu ikus muda asaun komunidade nian, redús konfuzaun fó instrusaun ba sosiedade hanesan edukasaun sívika no públika.

Fundamentu Teóriku
Artigu ne’e atu fundamenta de’it teoria Uses and Gratifications, atu haree audiénsia sira-nia satisfasaun relasaun ho mídia nia publikasaun. Definisaun teoria Uses and Gratification katak utilizadór mídia mak ativu hodi hili mídia no utiliza mídia atu kompleta sira-nia nesesidade (Nurudin, 2007:192). Sentidu husi teoria ne’e atu hateten katak, bainhira mídia fó sai informasaun, audiénsia mak ativu liu hodi mídia ne’ebé iha informasaun prienxe valor sira ezemplu proximidade, konflitu, interesante, atualidade, famozu nst.

Tuir Morissan utilizasaun no satisfasaun ka uses-and-gratifiction, mensionadu, hanesan teoria ne’ebé koñesidu iha estudu komunikasaun sosiál. Diferensa públiku alvu-individuál afeta ba audiénsia atu buka utiliza no hato’o hanoin tuir perspetiva konteúdu informasaun husi mídia, ho forma diferente, afeta mós husi fatór sosiál no psikolójiku indivíduu nian (Magno & Pacheco, 2022: 95). Audiénsia sai responsável ba hili mídia ne’ebé bele responde ba sira-nia nesesidade. Aleinde ne’e atu haree oinsá audiénsia sira hanesan konsumidór uza média sai ativu liu ka laduun ativu liu.

Liga ba lixu, tuir World Health Organization (WHO) lixu mak sasán ne’ebé la utiliza ona, buat ne’ebé ema soe husi atividade ema nian no la akontese mesak (Chandra 2007).

Lixu mak hanesan sasán ne’ebé ema rekoñese katak la uza ona maibé iha evolusaun teknolojia indústria ema balun uza prodús ho fali matéria seluk ne’ebé iha valór ekonóniku liuhusi métodu resiklajen.

Karakterístika Lixu tuir Notoatmodjo (2003), Lixu Bokon (Garbage) mak tipu lixu ne’ebé mai husi na’an pedasuk no modo sira ne’ebé ema soe, fabrika no provizaun hahán ne’ebé maioria husi substánsia ne’ebé dodok lalais. Ezemplu lixu husi modo tahan no na’an pedasuk sira-ne’ebé ema soe. Embora Lixu Maran (Rubbish), mak lixu ne’ebé bele lakan no la lakan mai husi uma sira no seluk-seluk tan.

Klasifikasaun lixu bazeia ba nia molda ka forma tuir publikasaun Tatoli.ip (2022, 2 outobru) kategoriza lixu ba oin tolu:
(1) Lixu Sólidu; lixu sólidu maka prodús husi rezultadu atividade indústria ka atividade doméstika ne’ebé ho forma sólidu. (2) Lixu Líkidu; lixu mak mistura entre kompozisaun fo’er ho bee mak dizolvidu ona. No líkidu sira uzadu ona, sai restu iha nia utilizasaun hodi so’e ba fatin lixeira sira mak hanesan: lixu metan ne’ebé mai husi líkidu casa de banho (poço casa de banho) nian. (3) Lixu Gazoza; mak lixu ne’ebé kontamina ona ho anin livre, no anin sai ponte ba transferénsia husi fatin ida ba fatin seluk. Naturalmente anin inkluidu ona ho elementu kímiku iha nia substánsia mak hanesan CO2, O2, H2 seluk-seluk tan”.

Diskute kona-ba lixu bokon no lixu maran, lixu Sólidu, Líkidu, Gazoza ho koñesimentu ema nian bele transforma ba materiál ne’ebé bele uza fali hanesan agua mamuk bele uza ba halo fali vazu ai-funan. Bainhira laiha meiu ida mak smplesmente bele kombate liuhusi la soe foe arbiru, halo limpeza no asaun seluk ne’ebé bele halo hahú husi asaun ema ida nian, família no sosiedade.

Haree ba realidade empirika iha Timor Leste audiénsia ativu tebes ba publikasaun notísia iha mídia nian ne’ebé halo publikasaun notísia kona-ba komunidade kombate lixu. Hakarak foti mós notísia ne’ebé fó sai iha mídia Tatoli kona-ba kombate lixu ho deskrisaun.

Mundu dezenvolve konvensaun foun kombate lixu plástiku”, Jornalista Fonseca, A., editora Catarina, J. (2022/08/22).
“Servisu jestaun merkadu Suai, prontu kombate lixu” Jornalista Teles, C., editór Colo, C. (2021/09/27).
“Proteje Ambiente no Tasi Labele Soe Lixu Arbiru” Jornalista Auxiliadora M, editora Almeida R. (2019/04/22).

Notísia ne’ebé sita iha relasaun ho títulu artigu nian, publikasaun notísia kona-ba kombate lixu, nia sentidu atu eduka sosiedade muda atetudu no asaun hodi kombate lixu liuhusi hamoos lixu, so’e lixu tau ba nia fatin (lixeiru) no foti fali lixu ne’ebé bele resikla atu nune’e bele redús lixu namkari iha suku laran hodi moris iha ambiente ne’ebé moos.

Iha publikasaun ne’e informa, eduka no dada audiénsia atu bele ativu hamoos lixu ne’ebé afeta ba inundasaun no lixu ne’ebé namkari iha area ne’ebé besik hela fatin.

Bazeia ba dadus ne’ebé rekolla iha loron 05 fulan Dezembru tinan 2022 iha suku Mascarinhas, relasiona ho títulu artigu no bazeia konseitu teoria Uses and Gratification, hatudu katak audiénsia uza mídia Tatoli hodi kombate lixu iha suku ne’ebé audiénsia hela ba.

Nune’e peskizadór sira, halo prova ka teste ba audiénsia ativu uza mídia ne’ebé dadaun ne’e iha Timor-Leste, artigu ne’e atu ko’alia liu kona-ba audiénsia ne’ebé satisfasaun uza mídia Tatoli hodi kombate lixu, iha suku Mascarinhas.
Bazeia ba estudu kazu ne’e konsege rekolla dadus ne’ebé haree liuba satisfasaun audiénsia uza Tatoli.Ip nian hodi kombate lixu iha suku Mascarinhas. Dadus ne’ebé rekolla husi audiénsia hanesan komunidade ho totál fonte na’in sanulu resin rua (12), mak sai respondente ba kestionáriu ne’ebé iha relasiona ho esperiénsia uza mídia Tatoli.Ip hodi kombate lixu.

Audiénsia nia asesu ba informasaun
Bazeia ba dadus ne’ebé rekolla husi komunidade suku Mascarinhas, ko’alia kona-ba, sira-nia haree ba notísia ne’ebé fó sai iha Tatoli.ip kontribui kombate lixu, hatudu katak, audiénsia suku Mascarinhas na’in 9 reprezenta 75% mak aseita katak publikasaun ne’ebé asesu husi mídia Tatoli bele muda sira-nia maneira tratamentu ba lixu. Embora audiénsia suku Mascarinhas na’in 3 reprezenta 25% mak laduun asesu informasaun husi Tatoli, Ip ho razaun kustu internét no hetan informasaun husi mídia seluk.

Audiénsia hanesan grupu ida-ne’ebé sai leitór, rona-na’in, haree-na’in hanesan audiénsia ba konteúdu mídia nian, (McQuail, 2011). Audiénsia mak ema ne’ebé sempre asesu informasaun husi mídia. Nune’e, informasaun sira refleta realidade ne’ebé hato’o.

Audiénsia utiliza mídia hodi rezolve problema ho konteúdu informasaun refleta situasaun ne’ebé audiénsia enfrenta. Audiénsia suku Mascarinhas hatudu katak satisfás ba mídia bainhira mídia bele promove problema ne’ebé sira enfrenta. Liuhusi asesu ba informasaun bele fó solusaun ba problema ruma. Informasaun iha mídia kompleta sira-nia nesesidade no mídia kontibui ba rezolve sira-nia problema. Mídia barak fó sai buat ruma ne’ebé ho nia sentidu eduka, hanesan liuhusi ensinu valór, étika no norma sira-ne’ebé aplika (Nurudin, 2007).

Liuhusi mídia audiénsia bele hetan no hatene informasaun no informasaun ne’ebé midia fó sai audiénsia sei halo tuir karik informasaun ne’e relevante ho saida mak audiénsia hasoru, hanesan kona-ba komabte lixu ne’ebé audiénsia sira halo tuir hodi hamoos lixu ka fo’er iha sira-nia bairu, aldeia, suku no iha munisípiu. Nune’e, mídia halo ona nia funsaun hanesan informativu, edukativu no kontrolu sosiál hodi iha sosiedade nia leet.

Notísia konsolida inisiativa ba kombate lixu
Bazeia ba dadus ne’ebé rekolla husi komunidade suku Mascarinhas, ko’alia kona-ba audiénsia nia inisiativa hodi hamoos lixu iha uma, indika katak, partisipante na’in 9 reprezenta 75%, mak senti katak, publikasaun notísia iha mídia Tatoli,Ip iha valór informativu no edukativu ba sira bele iha inisiativa hodi hamoos lixu iha sira-nia uma, audiénsia suku Mascarinhas na’in 3 reprezenta 25% mak laduun senti publikasaun notísia iha mídia Tatoli ne’e, tanba sira laduun asesu ba internet no razaun seluk.

Audiénsia mak rona na’in no haree na’in no audiénsia iha, tanba akumula husi komunidade ida-ne’ebé moris ho karakterístika oi-oin (Hiebert At all, 1985). Audiénsia iha nia karatér sosiál, nune’e audiénsia bele iha hakarak ka inisiativa ba saida mak sira presija halo. Nune’e, komunidade suku Mascarinhas nu’udar audiénsia no iha inisiativa rasik hodi hamoos lixu iha sira-nia uma, tanba publikasaun notísia kontribui kombate lixu.

Mídia Tatoli nia publikasaun konsege kontribui ba sira no muda sira-nia hanoin atu bele iha inisiativa hodi hamoos lixu loron-loron iha sira-nia hela fatin hodi hadook an husi impkatu negative sira-ne’ebé hadaet husi lixu.

Informasaun no suku saudável
Tuir dadus ne’ebé rekolla husi komunidade suku Mascarinhas, ko’alia kona-ba komunidade suku Mascarinhas prontu kontribui ba suku saudável, liuhusi ne’e hatudu katak, audiénsia na’in 11 reprezenta 92% mak konkorda mídia Tatoli.ip konsege asume nia papel kontribui suku saudável liuhusi informasaun ne’ebé klara, atuál, dura no refleta asaun ne’ebé loloos ema hotu presiza halo. Enkuantu audiénsia suku Mascarinhas na’in 1 reprezenta 8% ne’ebé partisipa hanesan respondente katak laiha opsaun ba resposta ne’ebé hato’o, razaun laduun asesu no dalaruma de’it mak publikasaun maibé informasaun seluk.

Mídia mak bele infuénsia audiénsia atu halo tuir saida mak mídia hato’o, tan ne’e mídia fahe informasaun ne’ebé iha relasaun ho sosiedade nia situasaun no kondisaun (Hiebert no nia kolega sira, 1985). Mídia partilla informasaun relasiona ho akontesimentu ne’ebé iha audiénsia nia ambiente ka ne’ebé mak ajuda audiénsia iha sira-nia moris lor-loron.

Mídia iha funsaun kontrolu sosiál, tan ne’e partilla informasaun bazeia ba kondisaun ne’ebé sosiedade enfrenta hanesan problema lixu no asuntu importante seluk. Nune’e, Tatoli.Ip kontrolu sosiál sosiedade liuhusi planu no publikasaun notísia kona-ba kombate lixu, bele influénsia audiénsia hodi prontu kontribui ba suku saudável ho hamoos lixu iha sira-nia rezidensia, área besik hela fatin no suku rasik.

Konkluzaun
Ajénsia Tatoli.Ip asumi papél promove informasaun oioin ba nia audiénsia, audiénsia mós iha kapasidade utiliza valór informasaun di’ak sira hanesan iha artigu ne’e audiénsia bele iha inisiativa atu hamoos lixu iha uma, so’e lixu tau iha nia fatin, bele foti fali lixu ne’ebé bele halo resiklajen uza fali hodi hamenus lixu namkari iha suku laran ka aldeia laran no audiénsia suku Mascarinhas mós prontu kontribui ba suku saudável, liuhusi hamoos lixu lor-loron.

Kategória lixu iha oioin ho nia fó impaktu ba ambiente lamoos mo lasaudável, hamosu moras ba komunidade, kontribui ba inundasaun iha tempu uza, suli ba mota lori ba tasi estraga biodiversidade tasi nian no seluk-seluk tan. Tan ne’e ema idadiak komprende nia papel rasik atu kontribui aumenta husi informasaun mídia liuliu Tatoli.ip iha kontekstu ne’e asaun ba kombate lixu importante ba ambiente moos no moris saudável sosiedade nian.
Liuhusi artigu ne’e, rekomenda katak (1) Tatoli.ip espera nafatin kontribui informasaun, liu-liu kona-ba asaun ba kombate lixu no forma edutivu sira seluk, (2) ba audiénsia no públiku uza de’it informasaun di’ak mídia nian atu nafatin iha konsiénsia hodi bele kombate lixu nune’e bele moris iha ambiente ne’ebé saudável.

Referénsia

Da Costa, Domingos. (2020).  Lixu Nia Impaktu Ba Ambiente No Umanidade. https://tatoli.tl/2020/02/10 /lixu-nia-impaktu-ba-ambiente-no-umanidade/. Aseu iha loron 20/02/2023.

Hiebert At All, (1985), Metode Penelitian Kualitatif. Dr. Drs. Sugeng Pujileksono Malang: Intrans Publishing.

Hougen  N.C Ventura, Fander. (2019). Perspetiva Lee na’in kona-ba Papél Jornál Business Timor Hodi Kotrola   Profisionalismu Empreza Nasionál Iha Munisípiu Díli, UNTL, Díli.

Magno, X. Marcelino & Da Costa, P. Roberto. (2022). Mídia Iha Sosiedade Timor Leste, UNTL,  Díli: Torafs Photo Copy and Printing.

Portal Governu. (2023). Ambiente, http://timor-leste.gov.tl/?cat=39&lang=tp. Asesu iha loron 24/01/2023.

Rakhmat, (2007, p.6). LANDASAN TEORI Uses and Gratification Theory https://dewey.petra.ac.id/repository/jiunkpe/jiunkpe/s1/ikom/2019/jiunkpe-is-s1-2019-51415091-45037-motif-chapter2.pdf. Asesu iha loron 24/01/2023.

McQuail, Dennis. (2011). Teori Komunkasi Massa, Edisi 6, Buku 2. Jakarta: Salemba Humanika http://eprints.umm.ac.id/40875/3/BAB%20II.pdf. Asesu iha loron 28/01/2023.

Morissan, Whardhani C, Andi. Hamid, Farid. (2013). Teori komunikasi massa. Jakarta: Ghalia Indonesia

Nurudin, M.Si. (2009). Pengantar Komunikasi Massa. Jakarta: PT. Raja Grafiindo Persada.

Tatoli.Ip (2022, 2 outobru). Kategoria Lixu, https://tatoli.tl/2023/01/24/produsaun-lixu-iha-dili-kada-tinan-aumenta/, asesu iha 29 Marsu 2023.

Suarna, I. W. (2008). Model Penanggulangan Masalah Sampah Perkotaan dan Perdesaan. In Seminar dan Lokakarya Dies Natalis UNUD ke-46 Universitas Udayana, file:///C:/Users/RSA/D ownloads/adminjiis,+Artikel+JIIS+Des+2017-1%20(1).pdf, asesu iha 28/01/2023.

Yunus, Syarifudin. (2010). Jurnalistik Terapan, Bogor: Ghalia Indonésia. http://eprints.umm.ac.id/40875/3/BAB%20II.pdf. Asesu iha loron 28/01/2023.

iklan
iklan

Leave a Reply

iklan
error: Content is protected !!