DILI, 17 abríl 2023 (TATOLI)–Diretór Jerál Arte no Kultura, Manuel Smith Ximenes, garante katak prosesu diseminasaun lei direitu de autór sei finaliza iha fulan juñu-tanba agora sira hahú ona faze daruak iha munisipiu Manufahi.
Notísia Relevante: Komisaun G aprova projetu-lei Kódigu Direitu Autór iha faze espesialidade
“Ha’u hakarak dehan de’it katak diseminasaun lei direitu de autór ne’e SEAK sei implementa iha loron 180 nia laran ne’e sei finaliza iha juñu nia laran, tanba ita tama ona ba faze daruak iha Manufahi,” Manuel Smith hateteb ba Agencia Tatoli iha nia kna’ar fatin, Avenida Portugál, segunda ne’e.
Nia hateten, diseminasaun dahuluk ne’ebé halo ona iha fulan kotuk iha munisipiu Bobonaro ne’e hetan antusiazmu makaas hosi entidade relevante sira-ne’ebé mak iha relasaun ho lei ne’e rasik. Liu-liu kona-ba sira-nia obra ne’ebé dala barak ema seluk uza tiha maibé la fó koñesimentu ba sira.
“Ho lei direitu de autór ne’e rasik sei proteje obra ema ida-nian, atu nune’e ema seluk labele ho ninia hakarak no ninia istilu rasik atu uza ka muda ema seluk nia obra tuir nia hakarak,” nia dehan.
Tanba ne’e, diseminasaun lei ne’e importante liu ba artista sira, ema-nia obra kulturál sira, ONG ho relijiozu sira, lia-na’in ho lider komunitária sira, tanba importante ba sira atu kompreende ho didi’ak kona-ba lei ne’e tanba sei ko’alia asuntu kulturál, asuntu ne’e ligadu ho sira-nia obra rasik.
Lei direitu de autór númeru 14/22, 21 de dezembru ne’e, bainhira SEAK organiza hodi halo diseminasaun ba munisípiu sira hetan tiha promulgasaun hosi Prezidente Repúblika, hodi nune’e fó tempu ba Governu durante loron 180 atu halo diseminasaun.
Agora ba oin, nia dehan, SEAK sei kontinua halo tan atividade ne’e iha munisipiu Manufahi tuir kalendáriu ne’ebé trasa ona, ne’ebé sei realiza iha loron tersa (18 abril 2023) ne’e.
Hein katak, ho atividade iha faze daruak ne’e entidade hotu ne’ebé relevante bele partisipa atu nune’e sira bele intende hodi divulga fali informasaun ne’e ba komunidade.
Jornalista : Tomé Amado
Editór : Cancio Ximenes
