DILI, 18 abríl 2023 (TATOLI)—Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, informa, Primeiru-Ministru (PM), Taur Matan Ruak sei partisipa Simeira Asosiasaun Nasaun Sudeste Aziátiku (ASEAN, sigla inglés), ne’ebé sei hala’o iha loron 9 to’o 11 maiu, iha Labuan Bajo, Nusa Tenggara Timur, Indonézia.
“Mai hasoru Primeiru-Ministru hodi ko’alia asuntu importante kona-ba preparasaun ba Simeria ASEAN nian ne’ebé mak sei halo iha Labuan Bajo, tanba Indonézia mak uma-na’in, sei partisipa hosi Xefe Estadu hotu membru ASEAN nian. Entaun ita-nian Xefe Ezekutivu mak bá,” Ministra Adaljiza Magno hateten hafoin hasoru Xefe Governu, iha Palásiu Governu, tersa ne’e.
Notísia relevante : PR Horta: ASEAN sei fó ‘roadmap’ kona-ba adezaun Timor-Leste
Ministra dehan, iha ámbitu reuniaun nível a’as ne’e Timor-Leste sei simu roteiru ne’ebé maka país ASEAN sira sei aprova no sei entrega mai Timor-Leste hodi prepara-an hodi sai membru plenu direitu asosiasaun.
“Preparasaun daudaun la’o ona hosi Diresaun Jerál ASEAN nian no identifika ona ema atu bá no mós koordenasaun ho Embaixada iha Indonézia inklui lojístika nian,” nia akresenta.
Delegasaun Timor-Leste xefia hosi Primeiru-Ministru no membru Governu mak Ministra Negósiu Estranjeiru no Kooperasaun, Embaixadór Timor-Leste iha Jakarta, líder hosi pilár tolu (polítika, seguransa, sosiál no kultura, no ekonomia), nune’e mós Diretór Jerál hosi Ministériu Solidariedade Sosiál no Inkluzaun (MSSI), Diretór Jerál SEAN MNEK, inklui Diretór Jerál hosi Ministériu Turizmu, Komérsiu no Indústria (MTKI).
“Ekipa Timor-Leste la liu na’in-30, ekipa ne’e barak liu mak tékniku sira tanba reuniaun ne’e la’ós de’it ba simeira ne’e de’it maibé molok to’o reuniaun nível-a’as ne’e sei iha reuniaun nível tékniku sira. Delegasaun sei arranka iha loron 9 maiu via aérea,” nia konklui.
Jornalista : Antónia Gusmão
Editora : Julia Chatarina
